کراچی (این این آئی)سندھ ہائی کورٹ نے امریکا سے لڑکیوں کی تعلیم کے سات ارب کے معاہدے اور فنڈز میں کرپشن سے متعلق سابق وزیر اعظم میاں نواز شریف کی صاحبزادی مریم نواز کے خلاف درخواست پر ڈپٹی اٹارنی جنرل کو جواب جمع کرانے کے لیئے 16اکتوبر تک مہلت دے دی۔منگل کو سندھ ہائیکورٹ کے دو رکنی بینچ کے روبرو امریکا سے لڑکیوں کی تعلیم کے7 ارب روپے کے معاہدے اور فنڈز میں کرپشن سے متعلق مریم نواز کے خلاف درخواست کی سماعت ہوئی۔
درخواست گزار کے وکیل نے کہا کہ مریم نواز نے مشل اوباما کے ساتھ امریکا میں پریس کانفرنس کی۔ نیوز کانفرنس میں “لیٹ گرلز لرن” مہم کا اعلان کیا گیا۔ دو لاکھ لڑکیوں کی تعلیم اور بہبود کا معاہدہ سرد خانے کی نذر ہوگیا۔ نیب سے سات ارب روپے کے فنڈزکی تحقیقات کرائی جائے۔ عدالت نے ڈپٹی اٹارنی جنرل سے معاہدے”لیٹ گرلز لرن” اور فنڈز کی تفصیلات طلب کرلیں۔ ڈپٹی اٹارنی جنرل نے کہا کہ وزارت داخلہ اور دیگر کو خط لکھ دیئے ہیں جواب کا انتظار ہے۔ عدالت نے جواب کیلئے 16 اکتوبر تک مہلت دے دی۔
