ڈھاکا(نیوز ڈیسک) بنگلہ دیش نے پاکستان کے خلاف ایک روزہ سیریز کے ابتدائی دو میچوں کے لیے 14 رکنی اسکواڈ کا اعلان کر دیا ہے۔بنگلہ دیش نے اعلان کردہ ٹیم میں دو نئے نوجوان کھلاڑیوں کو شامل کیا ہے جہاں رونی تالکڈر اور ابو الحسن کو قومی اسکواڈ کا حصہ بنایا گیا ہے۔
رونی اوپننگ بلے باز ہیں جنہیں ڈومیسٹک کرکٹ میں شاندار کارکردگی پر ٹیم کا حصہ بنایا گیا جبکہ پانچ ایک روزہ میچوں کا تجربہ رکھنے والے ابو الحسن فاسٹ باو¿لنگ کی وجہ سے شہرت رکھتے ہیں۔بنگلہ دیش نے اپنے ورلڈ کپ اسکواڈ میں تین تبدیلیاں کرتے ہوئے امرالقیس، تیج الاسلام اور شفیع الاسلام کو عالمی کپ کے لیے منتخب کردہ ٹیم سے باہر کردیا گیا ہے۔مشرفی مرتضیٰ کو ٹیم کی قیادت کے منصب پر برقرار رکھا گیا ہے لیکن سلو اوور ریٹ کے باعث انہیں ایک میچ کی پابندی کا سامنا ہے جس کے باعث وہ پہلے ایک روزہ میچ میں شرکت نہیں کر سکیں گے۔مرتضیٰ کی غیر موجودگی میں نائب کپتان شکیب الحسن بنگلہ دیشی ٹیم کی پہلے ایک روزہ میچ میں قیادت کریں گے۔
بقیہ اسکواڈ میں تمیم اقبال، مشفیق الرحیم، محموداللہ، رونی تالکڈر، سومیا سرکار، مومن الحق، ناصرحسین، صابر رحمان، تسکین احمد، ابوالحسن، روبیل حسین اور عرفات سنی کو شامل ہیں۔دونوں ملکوں کےدرمیان تین ایک روزہ میچز کی سیریز کا پہلا میچ 17 اپریل کو کھیلا جائے گا جبکہ سیریز کا دوسرا اور تیسرا میچ بالترتیب 19 اور 22 اپریل کو ہو گا۔اس کے بعد 24 اپریل کو دونوں ٹیمیں واحد ٹی ٹوئنٹی میچ میں آمنے سامنے ہوں گی جس کے بعد دو ٹیسٹ میچوں کی سیریز کھیلی جائے گی۔