ڈھاکہ (نیوز ڈیسک) سٹار بنگلہ دیشی آل راﺅنڈر شکیب الحسن پاکستان کے خلاف شیڈول ون ڈے سیریز کے پہلے میچ میں ٹیم کی قیادت کے فرائض انجام دیں گے۔ انہیں ریگولر کپتان مشرفی مرتضی کی جگہ یہ ذمہ داری دی گئی ہے جو کہ سلو اوور ریٹ کی بناءپر معطلی کی وجہ سے میچ میں حصہ نہیں لیں گے۔ بنگلہ دیش اور پاکستان کے درمیان ون ڈے سیریز کا پہلا میچ 17 اپریل کو کھیلا جائے گا۔ مرتضی کو گزشتہ ماہ منعقدہ ورلڈ کپ میں بھارت کے خلاف کھیلے گئے کوارٹر فائنل میچ میں سلو اوور ریٹ کی بناءپر ایک میچ کیلئے معطل کر دیا گیا تھا۔ بنگلہ دیش کرکٹ بورڈ کے صدر نظم الحسین نے تصدیق کر دی ہے کہ شکیب الحسن گرین شرٹس کے خلاف پہلے ایک روزہ میچ میں قائم مقام کپتان کی ذمہ داری نبھائیں گے۔ شکیب الحسن اس وقت بھارت میں ہیں جہاں پر وہ دفاعی چیمپئن کولکتہ نائٹ رائیڈرز کی دو میچوں میں نمائندگی کرنے کے بعد واپس وطن پہنچیں گے۔