اسلام آباد(مانیٹرنگ ڈیسک) نجی ٹی وی چینل کے پروگرام میں گفتگو کرتے ہوئے سینئر تجزیہ نگار مبشر لقمان نے کہا ہے کہ این اے 120 کے انتخابی نتائج جس وقت آ رہے تھے اس وقت مریم نواز شدید غصے میں تھیں، حالات ان کے حق میں نہیں تھے اور انہوں نے انتخابی نتائج کو دیکھتے ہوئے سخت الفاظ میں خواجہ سعد رفیق کو کہا کہ ’’اگر الیکشن کے یہ نتائج درست ہیں تو میں اس سے مطمئن نہیں اور ہمیں اپنے گریبان میں جھانکنے

کی ضرورت ہے‘‘۔ مبشر لقمان نے کہا کہ مریم نواز وٹس ایپ پر نام نہاد صحافیوں کو ہدایات دیتی رہیں کہ یہ خبر چلا دو اور وہ خبر چلا دو۔ جب یاسمین راشد کی لیڈ کی خبریں چینلز پر چلیں تو مریم نواز سب پر برس پڑیں اور انہوں نے پرویز رشید کو بھی اچھی خاصی جھاڑ پلائی۔ بلال یاسین کو بھی جھاڑ پڑی اور مریم اورنگزیب جا کر ان کے قدموں میں بیٹھ گئیںاور ان کے پائوں دبا کر کہنے لگیں کہ میڈیم ابھی ذرا انتظار کریں کیونکہ صرف چند پولنگ سٹیشنز کے نتائج آئے ہیں۔تمام یونین کونسلوں کا رزلٹ آجائے گا تو صحیح پتہ چلے گا رزلٹ کا۔ مبشر لقمان نے کہا کہ مریم نواز نے خواجہ سعد رفیق کو اپنے گریبان میں جھانکنے کا کہا، جس پر سعد رفیق کو بہت دکھ ہوا۔ اس کے بعد مریم نواز وہاں سے غصے کے ساتھ اٹھ کر چلی گئیں ۔بعد ازاں اپنے ایک بیان میں وفاقی وزیر ریلوے خواجہ سعد رفیق کا کہنا تھا کہ این اے 120 میں مسلم لیگ (ن) نہیں جمہوریت جیتی، مریم نواز اور بے نظیر بھٹو کا تقابل ابھی کرنا درست نہیں ہے، بے نظیر بھٹو بننے میں دہائیاں لگی ہیں، مریم نواز میری چھوٹی بہن کی طرح ہیں انکو ورثے میں میاں صاحب اور بیگم کلثوم نواز دونوں کی خوبیاں ملی ہیں، مریم نواز محنت کر رہی ہیں لیکن انہیں محتاط گفتگو کرنی چاہیے، مریم نواز اپنے والد کے نظریے کی تقلید کررہی ہیں اسلئے انہیں ٹارگٹ کیا جاتا ہے۔