کراچی(آن لائن )سندھ حکومت نے مردم شماری کے ابتدائی نتائج کو مسترد کرنے کا اعلان کردیا۔ سینیئر وزیر نثار کھوڑو نے کہا ہے کہ مردمشماری نتائج کے مسئلے پر آل پارٹیز طلب کرنے کا فیصلہ کیا ہے۔ مردم شماری میں سندھ کی آبادی کم ظاھر کرنا وفاق کی سازش ہے۔ ایک منصوبے کے تحت سندھ کی آبادی کم ظاہر کی گئی ہے۔وفاقی حکومت نے قومی مالیاتی ایوارڈ میں سندھ کا حصہ نہ بڑھانے کے لئے سندھ کی آبادی کو کم کیا گیا ہے۔ مردم شماری میں سندھ کے خدشات دور نہیں کئے گئے۔
وفاق نے مردم شماری کے نتائج کو راز میں رکھ کر سندھ کے ساتھ سازش کی ہے۔ سندھ کا مطالبہ تھا کے گھر شماری کے موقعے پر ہر گھر کو فارم کی فوٹو کاپی فراہم کی جائے۔سندھ کی آبادی کم ظاہر کرنے سے سندھ کے تمام خدشات درست ثابت ہوئے ہیں۔ مزید لائحہ عمل کے لئے تمام سیاسی جماعتوں کے ساتھ رابطے کرکے ای پی سی بلائی جائے گی۔سندھ اپنے حق سے دستبردار نہیں ہوگا اپنا حق لے کر رہیں گے۔ وفاقی حکومت کو سندھ کے ساتھ زیادتی نہیں کرنے دینگے۔
