اسلام آباد(مانیٹرنگ ڈیسک) چند روز قبل سابق وفاقی وزیر داخلہ چوہدری نثار علی خان نے اپنی پریس کانفرنس میں بیرونی خطرات کا ذکر کرتے ہوئے اہم انکشافات کئے تھے اور کہا تھا کہ صرف 4 لوگوں کو اس بارے میں پتہ ہے۔ اب نجی ٹی وی چینل 92 نیوز نے
ذرائع کے ھوالے سے یہ دعویٰ کیا ہے کہ چوہدری نثار نے اپنی پریس کانفرنس کے دوران جن بیرونی خطرات کا ذکر کیا تھا وہ در حقیقت امریکہ کی نئی افغان پالیسی ہی تھی جو امریکی صدر ڈونلڈ ٹرمپ کے پاکستان مخالف بیان سے بھی بہت زیادہ خطرناک ہے۔نجی ٹی وی چینل کی رپورٹ کےمطابق سابق وزیر اعظم نواز شریف، سابق وزیر داخلہ چوہدری نثار علی خان کو امریکہ کی نئی افغان پالیسی کا کئی ماہ پہلے ہی پتا چل گیا تھا جس کے بعد انہوں نے آرمی چیف جنرل قمر جاوید باجوہ اور ڈی جی آئی ایس آئی لیفٹیننٹ جنرل نوید مختار کو اعتماد میں لیا تھا، جبکہ سیاسی اور عسکری قیادت کئی ماہ سے پالیسی پر رد عمل تیار کر رہی تھی۔ نجی ٹی وی چینل نے رپورٹ میں ذرائع کے حوالے سے کہا ہے کہ امریکہ کی نئی افغان پالیسی میں یہ بات طے ہے کہ وہ دہشتگردوں کی محفوظ پناہ گاہوں کا بہانہ بنا کر پاکستان کے قبائلی علاقوں میں حملوں کی منصوبہ بندی کر رہا ہے ۔
