اسلام آباد(این این آئی)ٹیکسی یونین نے آن لائن کیب سروسز کے خلاف احتجاج کرتے ہوئے راول ڈیم چوک کو بلاک کردیا جس کے باعث مری اور اسلام آباد جانے والی سینکڑوں گاڑیاں پھنس گئیں ۔ تفصیلات کے مطابق اسلام آباد میں ٹیکسی یونین کی جانب سے اوبر اور کریم سمیت آن لائن کیب سروسز پر پابندی لگانے کیلئے مظاہرہ کیا گیا ۔
مظاہرین نے راول ڈیم چوک کوبلاک کردیا جس کے باعث مری اوراسلام آباد جانے والی سینکڑوں گاڑیاں پھنس گئیں۔ مظاہرین کی پولیس کے ساتھ تلخ کلامی کے بعد حالات کشیدہ ہوگئے جس پرپولیس نے آنسوگیس کے شیل منگوا لئے۔احتجاج کے دوران مظاہرین نے روک کر گاڑی کے شیشے توڑ دئیے اور ڈرائیور کو تشدد کا نشانہ بنانے کی کوشش کی تاہم موقع پر موجود پولیس نے اسے بچایا اور صورت حال کو قابو کرلیا۔ احتجاجی مظاہرین نے آن لائن کیب سروسز پر پابندی لگانے کا مطالبہ کیا اور کہاکہ آن لائن کیب سروس کی وجہ سے ان کا کاروبار شدید متاثر ہوا ہے اور آمدن میں نمایاں کمی ہوگئی ہے انہیں اپنے گھر کے اخراجات پورے کرنے کیلئے قرض لینا پڑ رہا ہے ۔
