تل ابیب (نیوز ڈیسک) ایران اور مغربی طاقتوں کے درمیان جوہری معاہدہ طے پانے کے بعد اسرائیل کی پریشانی میں بے پناہ اضافہ ہوگیا ہے اور اس ملک کے وزیراعظم مسلسل واویلا کررہے ہیں کہ یہ معاہدہ ایران کو نیوکلیئر طاقت بنانے اور اسرائیل کی تباہی کا سبب بنے گا۔
امریکی صدر باراک اوباما سے ٹیلی فون پر بات کرنے کے بعد اسرائیلی وزیراعظم بینجمن نیتن یاہو نے ٹی وی پر اپنے خطاب میں کہا ہے کہ ایران کے ساتھ کیا جانے والا معاہدہ اسے ایٹم بم بنانے سے نہیں روک سکے گا بلکہ یہ اس کا راستہ ہموار کرے گا اور یہ معاہدہ اسرائیل کی بقاءکے لئے بہت بڑا خطرہ ہے۔ اسرائیل کا موقف ہے کہ معاہدے کے نتیجے میں ایران پرلگائی گئی پابندیاں ختم ہونے سے اس کی اقتصادی طاقت میں اضافہ ہوجائے گا جبکہ یہ اپنا جوہری پروگرام ختم کرنے کی بجائے ایٹم بم بنانے کو ترجیح دے گا جو بالآخر اسرائیل کی بربادی کا سبب بنے گا۔اسرائیلی وزیر اعظم نے امریکی صدر پر زور دیا کہ ایران سے اسرائیل کا وجود تسلیم کروایا جائے۔
ایران اور مغربی طاقتوں کے درمیان طے پانے والے معاہدے کے مطابق ایران یورینیم کی افزودگی اور جوہری مقاصد کے لئے استعمال ہونے والی پلوٹونیم کی تیاری میں خاطر خواہ کمی کردے گا جس کے نتیجے میں اس کے خلاف لگائی گئی سخت اقتصادی پابندیاں ختم کردی جائیں گی۔ معاہدے کے مطابق ایران کا نیوکلیئر پروگرام دس سال تک جاری رہے گا اور یہی بات اسرائیل کے لئے تشیوشناک ہے کہ ایک طرف تو ایران پر عائد اقتصادی پابندیاں ختم کی جارہی ہیں اور دوسری طرف اس کا نیوکلیئر پروگرام بھی مکمل طور پر ختم نہیں کیاجارہا ہے۔ معاہدہ طے پانے کے بعد اسرائیل مغربی طاقتوں اور خصوصاً امریکا سے مسلسل فریاد کررہا ہے کہ اسے تباہ ہونے سے بچایا جائے۔
