اسلام آباد (مانیٹرنگ ڈیسک ) تقسیم ہند کے بعد ہی سے پاکستان اور بھارت کے درمیان میں خاصی کشیدگیاں رہیں۔ اگرچہ تمام مسائل میں مسئلہ کشمیر سب سے بڑا مسئلہ رہا مگر دوسرے سرحدی تنازعات بھی چلتے رہے مثلا Rann of Kutch کا مسئلہ جس نے 1956ء میں سر اٹھایا۔ رن آف کچھ بھارتی گجرات کا ایک بنجر علاقہ ہے، اس مسئلے کا اختتام بھارت کے متنازع علاقے پر دوبارہ قبضے سے ہوا۔کچھ اخبارات کے مطابق جنوری 1965ء میں پاکستانی سرحدی محافظوں نے بھارتی علاقے میں گشت شروع کر دیا جس کے بعد 8 اپریل 1965 کو دونوں ممالک نے ایک دوسرے کی سرحدی پوسٹوں کے اوپر حملے شروع کر دئیے۔

ابتدا میں دونوں ممالک کی سرحدی پولیس کے درمیان یہ تنازع چلتا رہا مگرجلد ہی دونوں ممالک کی افواج آمنے سامنے آگئیں۔ ۶۵ کی جنگ میں ایک واقعہ جو بے حد مشہور ہوا کہ لیفٹیننٹ کرنل نصیر اللہ بابر، جو بعد ازاں میجر جنرل کی حیثیت سے ریٹائر ہوئے، ایک بہادر افسر تھے۔ 1965ء کی جنگ کے دوران وہ ایوی ایشن اسکواڈرن کی قیادت کررہے تھے کہ یکم ستمبر کو غلطی سے ایک بھارتی چوکی میں چلے گئے۔ اس خطرناک صورتحال میں بھی انہوں نے اپنے اعصاب پر قابو رکھا اور 55 سکھ سپاہیوں کو گرفتار کیا۔ اس شاندار کارنامے پر انہیں ستارۂ جرات سے نوازا گیا۔

موضوعات:۱۹۶۵ کی جنگ