اسلام آباد (آئی این پی) قومی اسمبلی میں قائد حزب اختلاف خورشید شاہ نے کہا ہے کہ اپنی بقا کے لئے ریلی نکالنا ہر جماعت کا حق ہے‘ میاں صاحب بہت دیر کردی مہرباں آتے آتے‘ آرٹیکل 62,63 کے خاتمے کے لئے میاں صاحب کی منتیں کی تھیں‘ نواز شریف کو چار سال سے میری بات سمجھ نہیں آئی‘ نواز شریف نے وہ شاخ کاٹی جس پر وہ بیٹھے رہے ہیں۔ بدھ کو میڈیا سے گفتگو کرتے ہوئے خورشید شاہ نے کہا کہ نواز شریف کو چار سال سے میری بات سمجھ نہیں آئی۔
کرسیاں ملتی ہیں تو یہ سب کچھ بھول جاتے ہیں۔ میاں صاحب بہت دیر کردی مہرباں آتے آتے۔ نواز شریف پارلیمنٹ کی وجہ سے تیسری بار وزیراعظم بنے نواز شریف نے عوام میں جانے کا فیصلہ بہت دیر سے کیا۔ انہوں نے کہا کہ تمام مسائل کا حل اب پیپلز پارٹی کے پاس ہے۔ اسمبلی کی مدت چار سال ہونی چاہئے آرٹیکل 62,63 میں تبدیلی کا وقت نہیں ہے۔ آرٹیکل 62,63 کے خاتمے کے لئے میاں صاحب کی منتیں کی تھیں میاں صاحب کو غلط مشورے دیئے جاتے رہے۔
