اسلام آباد(آئی این پی) مختلف ممالک نے سبکدوش وزیراعظم نواز شریف کے جی ٹی روڈ پر سفر اور متوقع عوامی طاقت کے مظاہرے میں دلچسپی لینا شروع کر دی، مختلف ذرائع سے اس حوالے سے معلومات کا حصول شروع ہو گیا۔ ذرائع نے دعویٰ کیا ہے کہ اسلام آباد میں مختلف سفارتخانوں کی طرف سے سبکدوش وزیراعظم نواز شریف کی سیاسی اور عوامی سر گرمیوں میں گہری دلچسپی لی جا رہی ہے،
جی ٹی روڈ پر سابق وزیراعظم کی قیادت میں پاکستان مسلم لیگ (ن) کے عوامی طاقت کے مظاہرے کی رپورٹس مرتب ہوں گی جو اپنے ممالک کو بھجوائی جائیں گی، یہ ممالک وزارت عظمیٰ سے سبکدوشی کے بعد محمد نواز شریف کی عوامی طاقت کا اندازہ کرنا چاہتے ہیں، جی ٹی روڈ پر عوامی ہجوم، ریلیوں، مظاہروں ، استقبال سے آگاہی میں سفارتخانے دلچسپی رکھتے ہیں اور مختلف ذرائع سے رپورٹس کے حصول کا انتظام کیاجا رہا ہے۔میڈیا کی رپورٹس کو اس حوالے سے خصوصی طور پر مانیٹر کیا جائے گا۔
