لاہور (نیوز ڈیسک)ورلڈ کپ میں ناقص کارکردگی دکھانے والے عمر اکمل اور ناصر جمشید کی دورہ بنگلہ دیش کیلئے قومی ٹیم سے چھٹی کرنے کا فیصلہ کر لیا گیا۔ ورلڈ کپ دونوں بلے بازوں کےلئے ناکام ثابت ہوا تھا۔ عمر اکمل کو ناقص کارکردگی کے ساتھ ساتھ خراب رویئے کی وجہ سے بھی مسائل کا سامنا ہے۔پی سی بی کی نئی سلیکشن کمیٹی ان دنوں لاہور میں موجود ہے جہاں آج اس کا دوسرا اجلاس ہو گا۔ ایک روز قبل اجلاس میں متعدد اہم فیصلے کئے گئے جس میں یہ بھی شامل ہے کہ خراب رویئے اور خراب فارم والے کھلاڑیوں کے ساتھ رعایت نہیں برتی جائے گی۔ ورلڈ کپ میں ناصر جمشید نے تین میچ کھلیے اور کسی میچ میں بھی نہ چل پائے جب کہ ان کی فیلڈنگ بھی انتہائی ناقص رہی۔عمر اکمل کی کارکردگی بھی ناقص رہی ساتھ ہی ان کی فیلڈنگ کوچ گرانٹ لوڈن کے ساتھ جھگڑے کی خبریں بھی سامنے آئیں جس کے بعد فیصلہ کیا گیا ہے کہ انہیں بھی بنگلہ دیش نہ بھیجا جائے۔ محمد عرفان فٹنس مسائل کے سبب ٹیم کا حصہ نہیں بنائے جائیں گے۔