کراچی (این این آئی)ایڈیشنل سیکریٹری اور بورڈ آف انویسٹمنٹ کے ایگزیکٹیو ڈائریکٹر جنرل شاہجہان شاہ نے چائنا پاکستان اقتصادی راہداری منصوبے( سی پیک) کی اہمیت کو اجاگر کرتے ہوئے کراچی کی تاجر وصنعتکار برادری کو یقین دلایاہے کہ سی پیک ایک گیم چینجر ہے جس کا ترقیاتی کام ہر مرحلے میں شفاف طریقے سے جاری ہے اور اس منصوبے کا حصہ بننے کے خواہش مند مقامی و غیر ملکی سرمایہ کاروں کے درمیان کسی قسم کی کوئی تفریق نہیں رکھی گئی ۔
ان خیالات کا اظہار انہوں نے کراچی چیمبر آف کامرس اینڈ انڈسٹری( کے سی سی آئی) اور بورڈ آف انویسٹمنٹ کے اشتراک سے ’’سی پیک مواقع و چیلنجز‘‘ کے موضوع پر منعقدہ سیمینار کے موقع پر خطاب میں کیا ۔اس موقع پر ڈی جی بورڈ آف انویسٹمنٹ نسرین علی، چیئرپرسن سندھ بورڈ آف انویسٹمنٹ ناہید میمن، ڈائریکٹر بی او آئی ظہفران قاسم، ڈپٹی ڈائریکٹربی او آئی آفتاب احمد،پروجیکٹ ڈائریکٹر سی پیک وزارت پلاننگ ڈیولپمنٹ و ریفارمز حسن داؤد، کراچی میں چینی قونصلیٹ کے قونصلر اتاشی ٹونی یانگ اور میرانڈا لی بھی موجودتھیں جبکہ کے سی سی آئی کے صدر شمیم احمد فرپو،سینئر نائب صدر آصف نثار، نائب صدر محمد یونس سومرو،سابق صدر کے سی سی آئی اے کیو خلیل.مجید عزیز،عبداللہ ذکی اور منیجنگ کمیٹی کے اراکین بھی سیمینار میں شریک تھے۔
