اسلام آباد(آئی این پی)وفاقی وزیر داخلہ چوہدری نثار علی خان کے ترجمان نے کہا ہے کہ یہ تاثر سراسر غلط ہے کہ وزیر داخلہ پارٹی قیادت سے ناراض ہیں اور انہیں منانے کی کوشش کی جا رہی ہے،حقیقت یہ ہے کہ وزیر داخلہ نے چند اہم امور پر پارٹی کی اندرونی میٹنگ میں ایک ایشو پر ایک موقف اختیار کیا جس کے بعد انہیں تمام مشاورتی عمل سے علیحدہ کر دیا گیا۔بدھ کو وزیر داخلہ کے ترجمان کی طرف سے جاری بیان کے مطابق وزیر داخلہ چوہدری نثار علی خان کے پارٹی قیادت سے ناراض ہونے کا تاثر سراسر غلط ہے۔
ترجمان کے مطابق وزیر داخلہ کا یہ موقف ہے کہ انہیں بتایا جائے کہ ایسا کیوں کر ہوا اور کیا اسکی وجہ انکا وہ موقف ہے جو انہوں نے پارٹی کی اندرونی میٹنگ میں لیا یا پھر اسکی کوئی اور وجہ ہے۔ ترجمان کے مطابق وزیر داخلہ کا یہ بھی موقف ہے کہ جب تک ان معاملات کی وضاحت نہیں ہوتی تب تک مسئلے کو مثبت انداز سے سلجھانے میں دقت رہے گی۔
