لاہور (نیوز ڈیسک) پاکستان کرکٹ بورڈ ( پی سی بی) نے اظہر علی کو ون ڈے کرکٹ ٹیم کا کپتان بنانے کا اصولی فیصلہ کر لیا گیا ہے اور اس کا باقاعدہ اعلان کرنے کیلئے گورننگ بورڈ کا اجلاس منگل کو طلب کر لیا ہے۔ تفصیلات کے مطابق اظہر علی کو کپتان بنانے کا باقاعدہ اعلان گورننگ بورڈ کے اجلاس کے بعد کیا جائے گا۔
ذرائع کے مطابق وکٹ کیپر بلے باز سرفراز احمد کو ون ڈے اور ٹی 20 ٹیم میں نائب کپتان بنانے کافیصلہ بھی کیا گیا ہے۔ واضح رہے کہ اس سے قبل یہ اطلاعات سامنے آئی ہیں کہ پی سی بی نے معین خان کو چیف سلیکٹر کے عہدے سے فارغ کر کے ہارون الرشید کو تعینات کرنے کافیصلہ بھی کیا ہے۔
واضح رہے کہ اظہر علی پاکستان ٹیسٹ ٹیم کے مضبوط رکن ہے تاہم ون ڈے ٹیم کے مستقل رکن نہیں ہیں اور ورلڈکپ سکواڈ میں بھی ان کا نام شامل نہیں کیا گیا تھا تاہم اب ون ڈے ٹیم میں مسلسل کھیلنے والے کرکٹرز کو نظرانداز کر کے اظہر علی کو کپتان بنانے کافیصلہ کر لیا گیا ہے۔