راولپنڈی /انقرہ(آئی این پی )پاکستان اور ترکی کی عسکری قیادت نے کثیر الجہتی دفاعی تعاون کو مزید فروغ پر اتفاق کیا ہے جبکہ آرمی چیف جنرل قمر جاوید باجوہ نے کہا ہے کہ ترکی کاپاکستان کے عوام کے دلوں میں خصوصی مقام ہے ، ترکی کی عسکری قیادت نے دہشتگردی کے خلاف جنگ اور خطے میں امن واستحکام کیلئے پاک فوج کی کوششوں کو قابل ستائش قراردے دیا ۔
منگل کو پاک فوج کے شعبہ تعلقات عامہ (آئی ایس پی آر) کے مطابق چیف آف آرمی سٹاف جنرل قمر جاوید باجوہ سرکاری دورے پر ترکی پہنچے ہیں جہاں انہوں نے جدید ترکی کے بانی کمال اتاترک کے مزار پر حاضری دی اور بابائے ترک قوم کو خراج عقیدت پیش کرنے کیلئے پھولوں کی چادرچڑھائی اور وہاں رکھی گئی کتاب میں اپنے تاثرات درج کئے ۔ آرمی چیف نے ترکی کی لینڈ فورس کے ہیڈکوارٹر زکا بھی دورہ کیا جہاں لینڈ فورس کے کمانڈر جنرل صالح ذکی کولیک نے ان کا استقبال کیا ۔ اس موقع پر انہیں گارڈ آف آنر بھی پیش کیا گیا۔ ترک لیڈر فورس کے ہیڈ کوآرٹر کے دورہ کے موقع پر جنرل قمر جاوید باجوہ کو ترکی کی بری افواج ، ان کے تربیت ، دفاعی پیداوار اور امن آپریشنز کے علاوہ خطے کی سلامتی کی صورتحال سے متعلق تفصیلی بریفنگ دی گئی ۔ آئی ایس پی آر کے مطابق آرمی چیف کو ترکی بڑے اعزاز لیجن آف میرٹ سے نوازا گیا ۔ اس حوالے سے سادہ مگر پروقار تقریب منعقد ہوئی جس میں جنرل قمر جاوید باجوہ کی پاک ترک دفاعی تعلقات کے فروغ میں ان کی خدمات کے اعتراف میں یہ عظیم اعزاز دیا گیا ۔ اس موقع پر اپنے خطاب میں جنرل قمر جاوید باجوہ نے کہا کہ تمام پاکستانیوں کے دل میں ترکی کیلئے خصوصی مقام ہے ۔ انہوں نے ملنے والا ایوارڈ پاکستان اور ترکی کی مسلح افواج کے شہداء کے نام وقف کردیا ۔
بعدازاں ترکی کے چیف آف جنرل سٹاف جنرل ہولوسی آکار سے ملاقات کی اور ان سے علاقائی سلامتی ، دونوں ممالک کی مسلح افواج کے امن واستحکام کیلئے کردارسمیت باہمی دلچسپی کے امور پر تفصیلی تبادلہ خیال کیا گیا ۔ دونوں عسکری رہنماؤں نے کثیر الجہتی دفاعی تعاون کو مزید فروغ دینے پر بھی اتفاق کیا ۔ ترکی کی عسکری قیادت نے دہشتگردی ، امن آپریشنز اور فساد زدہ علاقوں میں استحکام کیلئے کردار ادا کرنے پر پاک فوج کے کردار اور کوششوں کی تعریف کی اور کہا کہ اس کی کوششیں قابل ستائش ہیں ۔
