لاہور ( این این آئی) پاکستان کرکٹ بورڈ نے چیمپئنز ٹرافی کرکٹ ٹورنامنٹ میں شاندار کار کردگی دکھانے پر قومی کرکٹ ٹیم کے اعزاز میں تقریب منعقد کرنے کا فیصلہ کر لیا ،شاہینوں کو انعامات سے نوازا جائے گا۔بتایا گیا ہے کہ اوول کے تاریخی میدان پر بھارتی سورماؤں کو دھول چٹا کر چیمپئنز ٹرافی میں کامیابی حاصل کرنے والی قومی ٹیم کے اعزاز میں عیدالفطر کے بعد شایان شان تقریب کا اہتمام کیا جائے گا۔پی سی بی کی جانب سے منعقدہ تقریب میں قومی ٹیم کو انعامات دئیے جائیں گے ،
ٹورنامنٹ میں عمدہ کارکردگی پر فخر زمان ،حسن علی ،اظہر علی اور سرفراز احمد کوخصوصی انعامات سے نوازا جائے گا۔صدر لاہور ریجن کرکٹ ایسو سی ایشن خواجہ ندیم احمد نے بھی فاتح عالم کھلاڑیوں کے لئے تقریب کا اہتمام کرنے اور خصوصی انعامات دینے کا اعلان کیا ہے۔دوسری جانب چیمپئنز ٹرافی میں شاندار کارکردگی پر سینٹ کی قائمہ کمیٹی نے شاہینوں کو پارلیمنٹ میں مدعو کرنے کا اعلان کیا ، میئر کراچی وسیم اختر نے بھی پوری ٹیم کے اعزاز میں تقریب کا اعلان کیا۔
