ممبئی (این این آئی)ویسے تو رنبیر کپور اور کترینہ کیف کی فلم جگا جاسوس کا سبھی کو بے صبری سے انتظار ہے تاہم فلم کی ٹیم شائقین کی خواہشات کو مدنظر رکھتے ہوئے آہستہ آہستہ فلم کے گانے اور ٹریلر جاری کرتی آرہی ہے۔اب اس فلم کے 29 میں سے مزید ایک گانے ’غلطی سے مسٹیک‘ کو ریلیز کردیا گیا ہے۔گانے میں رنبیر کپور اور کترینہ کی ڈانس اور پرفارمنس کی وجہ سے گانا فلم ریلیز ہونے سے پہلے ہی ہٹ ہوگیا۔گانے کو 9 جون کو ریلیز کیا گیا تھا،
اور اب تک اسے 67 لاکھ سے زائد بار دیکھا جاچکا ہے۔جگا جاسوس کے اس گانے کو سلمان خان کی فلم ٹیوب لائیٹ میں راحت فتح علی خان کی آواز میں شامل ’تنکا تنکا دل میرا‘ کے ساتھ ریلیز کیا گیا تھا۔دونوں ہی گانے ریلیز ہوتے ہی ہٹ ہوگئے، پہلے دن راحت فتح علی خان کے گانے کے چرچے رہے، تاہم بعد میں رنبیر کپور اور کترینہ کیف کا غلطی سے مسٹیک آگے نکل گیا۔گانے کی کامیابی کے بعد اداکارہ کترینہ کیف نے اپنے انسٹاگرام اکاؤنٹ پر رنبیر کپور کے ساتھ ایک سیلفی اور ڈانس پریکٹس کی ویڈیو بھی جاری کی اور اسے بھی ہزاروں افراد دیکھ چکے ہیں۔جگا جاسوس کو آئندہ ماہ ریلیز کیے جانے کا امکان ہے، تاہم اس کی حتمی تاریخ کا اعلان نہیں کیا گیا۔یہ بھی خبریں ہیں کہ ممکنہ طور دونوں اداکاروں کی یہ آخری فلم ہوگی، کیوں کہ دونوں ایک دوسرے کے ساتھ کام نہیں کرنا چاہتے، لیکن بعض لوگوں کا خیال ہے کہ جگا جاسوس کی شوٹنگ کے دوران رنبیر اور کترینہ میں قربتیں بڑھی ہیں اور یہ سلسلہ مزید آگے بڑھے گا۔

موضوعات:جگا جاسوس