ملتان/مظفرگڑھ(آئی این پی)پاکستان عوامی راج پارٹی کے سربراہ رکن قومی اسمبلی جمشید دستی کو مظفرگڑھ پولیس نے ساتھیوں سمیت گرفتار کرلیا،پولیس حکام کے مطابق جمشیددستی پر28مئی کو زبردستی ڈینگا کینال کھولنے کے مقدمہ سمیت 25 سے زائد مقدمات درج ہیں ،رکن قومی اسمبلی کو اسلام آباد سے مظفرگڑھ آتے ہوئے گرفتارکیا گیا ،ان کے ہمراہ چئیرمین یونین کونسل اجمل کالرو کوبھی گرفتار کرلیا گیا۔

پولیس ترجمان کے مطابق جمشیددستی کو تھانہ قریشی پولیس نے چوکی ریاض آباد پر گرفتار کیا۔جمشیددستی نے 28 مئی کو زبردستی ڈینگا کینال کھول دی تھی،جس پر ان کیخلاف مقدمہ زیردفعہ353،186،438،148،149 ت پ کے تحت درج کیاگیاتھا۔پولیس نے جمشیددستی کی گاڑی سے ایک جی تھری رائفل بھی قبضہ میں لے لی ہے،دوسری طرف جمشیددستی کی گرفتاری پر پاکستان عوامی راج پارٹی کے پارٹی رہنماؤں اورکارکنوں نے شدید ردعمل کا اظہارکرتے ہوئے احتجاج کی دھمکی دی ہے۔دوسری طرف پاکستان عوامی راج پارٹی کے سربراہ رکن قومی اسمبلی جمشید دستی کی گرفتاری کیخلاف آئل ٹینکرز ایسوسی ایشن نے ملک بھر تیل کی سپلائی بند کرنے کی دھمکی دے دی۔چئیرمین آل پاکستان آئل ٹینکرز ایسوسی ایشن فیض اللہ آفریدی نے میڈیا کو جاری کیے گئے اپنے بیان میں کہا ہے کہ ؛ جمشید دستی کے خلاف انتقامی کارروائی کی جارہی ہے ،انہوں نے ہمیشہ غریب اور مزدور طبقے کی آوازاٹھائی ہے۔فیض اللہ آفریدی نے کہا ہے کہ آئل ٹینکرز ایسوسی ایشن جمشیددستی کی گرفتاری پرشدیداحتجاج کرتی ہے۔اگر اگلے 24 گھنٹے میں جمشید دستی کو رہا ناکیا تو کراچی سے خیبر تک تیل کی سپلائی بند کردیں گے۔