بدین(نیوز ڈیسک) سندھ کے سابق وزیر داخلہ ڈاکٹر ذوالفقار مرزا نے رواں ماہ کے دوران لندن یا دبئی میں کسی بھی ایم کیو ایم رہنما سے ملاقات کی خبروں کی سختی سے تردید کردی ہے۔لندن سے ٹیلی فون کے ذریعے میڈیا کے نمائندوں سے بات چیت کرتے ہوئے سابق وزیر داخلہ سندھ کا کہنا تھا کہ وہ ستمبر 2011ء میں کراچی پریس کلب میں پریس کانفرنس کے دوران ایم کیو ایم کے خلاف لگائے جانے والے الزامات پر قائم ہیں۔مذکورہ پریس کانفرنس میں ذوالفقار مرزا نے قرآن کا نسخہ اپنے سر پر رکھ کر ایم کیو ایم کے سربراہ سمیت پارٹی کے بیشتر رہنماوں پر دہشت گردی اور سنگین جرائم میں ملوث ہونے کے الزامات لگائے تھے اور دعویٰ کیا تھا کہ ان کے پاس اس حوالے سے ثبوت بھی موجود ہیں۔ڈاکٹر ذوالفقار مرزا کا کہنا تھا کہ وہ خفیہ ملاقاتوں پر یقین نہیں رکھتے ہیں۔انہوں نے الزام عائد کیا کہ بحریہ ٹاون کے سربراہ ملک ریاض اور مصطفیٰ کمال اب بھی ایم کیو ایم کی دی جانے والی ہدایات کے مطابق کام کرتے ہیں اور وہ ایسے لوگوں سے بات کرنے کا سوچ بھی نہیں سکتے۔ان دنوں میڈیا میں خبریں گردش کررہی ہیں کہ ذوالفقار مرزا نے رواں ماہ دبئی میں کراچی کے سابق ناظم مصطفیٰ کمال اور لندن میں ایم کیو ایم رہنما سلیم شہزاد سے ملاقاتیں کی ہیں۔ذولفقار مرزا نے خبردار کیا کہ ایم کیو ایم اور دیگر کچھ قوتیں سندھ کے گورنر عشرت العباد کی جگہ مصطفیٰ کمال کو سندھ کا گورنر مقرر کرنے کی کوششوں میں مصروف ہیں۔اس موقع پر انہوں نے ایک بار پھر سندھ کے گورنر ڈاکٹر عشرت العباد کو عہدے سے ہٹانے اور ان کے خلاف ایم کیو ایم کے کارکن صولت مرزا کی ڈیتھ سیل سے جاری ہونے والی ایک وڈیو میں لگائے جانے والے الزامات پر تحقیقات کروانے کا مطالبہ کیا۔سابق صوبائی وزیر داخلہ نے کہا کہ صولت مرزا کا ویڈیو بیان اور ان کی جانب سے 2011ء4 میں ایم کیو ایم کے خلاف لگائے گئے الزامات ایک جیسے ہی ہیں۔انہوں ںے اس عزم کا اظہار کیا کہ وہ ایم کیو ایم اور پاکستان پیپلز پارٹی میں موجود دہشت گرد اور جرائم پیشہ عناصر کے خلاف اپنی جنگ جاری رکھیں گے۔ذوالفقار مرزا نے 11 مارچ کو ایم کیو ایم کے مرکز نائن زیرو پر دہشت گردوں کے خلاف ہونے والے سرچ آپریشن کو سیکیورٹی ایجنسیز کی جانب سے اہم پیش رفت قرار دیتے ہوئے مطالبہ کیا کہ دہشت گردی کے خاتمے تک ایسے آپریشن جاری رکھے جائے۔ذوالفقار مرزا نے ایک بار پھر تصدیق کی کہ ان کا تعلق پیپلز پارٹی کے ساتھ قائم ہے اور وہ پارٹی کے چیئرمین بلاول بھٹو زرداری کی سربراہی میں پارٹی کے دشمنوں کے خلاف اپنی مہم دوبارہ شروع کریں گے۔