پیانگ یانگ(آئی این پی) شمالی کوریا نے امریکی صدر ڈونلڈ ٹرمپ کے بیانات کا جواب دیتے ہوئے ایٹمی دھماکے کی دھمکی دیدی ۔غیر ملکی میڈیا کے مطابق شمالی کوریا کا کہنا ہے کہ وہ اپنی قوت میں زیادہ سے زیادہ اضافہ کرنے کیلیے تجرباتی ایٹمی دھماکوں کی تیاری کررہا ہے۔ٹرمپ اپنے حالیہ بیانات اور انٹرویوز میں متعدد بار شمالی کوریا کے ساتھ بڑی جنگ کا امکان ظاہر کرچکے ہیں جبکہ جزیرہ نما کوریا کے اطراف سمندر میں اب تک امریکا کی جانب سے بحری بیڑا بھی پہنچایا جاچکا ہے

جس میں نیوکلیائی طاقت سے چلنے والا طیارہ بردار بحری جہاز یو ایس ایس کارل ونسن تازہ ترین اضافہ ہے۔ان سب باتوں کے جواب میں شمالی کوریا کی وزارتِ خارجہ نے اعلان کیا ہے کہ غیرمعمولی حالات کی موجودگی میں شمالی کوریا کسی بھی حد تک جانے سے گریز نہیں کرے گا اور مخالفین پر زیادہ سے زیادہ دبا برقرار رکھنے کیلیے وہ اپنی ایٹمی طاقت میں بھی اضافہ جاری رکھے گا۔ اس پالیسی کے تحت مزید میزائل تجربات کے علاوہ ایٹمی ہتھیاروں کے تجرباتی دھماکے بھی کیے جائیں گے۔