ممبئی(آئی این پی)بھارت میں طیاروں کی ہائی جیکنگ کے خطرے کے پیش نظر ممبئی،حیدر آباد اور چنائی ایئرپورٹ کی سکیورٹی کو ہائی الرٹ کردیا گیا ۔بھارتی میڈیا کے مطابق ممبئی پولیس کو ایک خاتون کی جانب سے ای میل موصول ہوئی ہے جس میں وہ دعوی کررہی ہے کہ طیاروں کو ہائی جیک کیا جاسکتا ہے جس کے بعد تینوں ایئرپورٹس کی سکیورٹی کو سخت کردیا گیاہے۔
پولیس کے مطابق ہفتہ کے روز ممبئی پولیس کو ایک خاتون نے ای میل کی کہ وہ ایک ریسٹورنٹ میں بیٹھی تھی جہاں پر اس نے 6 افراد کو ممبئی،حیدر آباد اور چنائی ایئرپورٹ کی مختلف پروازوں کو ہائی جیک کرنے کی باتوں کو سنا۔ممبئی پولیس نے ای میل کی کو تمام سکیورٹی اور خفیہ اداروں کے ساتھ شیئر کیااور تینوں ایئرپورٹس کے حکام کے ساتھ ملاقات میں ای میل کی معلومات کے بارے بات کی گئی۔ایئرپورٹس سکیورٹی فورس کے ڈی جی نے سکیورٹی خطرے کی تصدیق کی اور تمام ایئرپورٹس کی سکیورٹی سخت کرنے کیلئے ہدایت جاری کی جبکہ ایئرپورٹس پر سراغ رساں کتوں کی مدد سے بھی سکیورٹی کا جائزہ لیا جارہا ہے۔
