اسلام آباد (نیوز ڈیسک)دنیا اس وقت تیزی سے تبدیل ہو رہی ہے ، ہر آنے والا دن ، سال اور مہینہ اپنے اندر لازماََ کچھ نہ کچھ نیا بدلاو¿ ضرور لا رہا ہے۔ ماحولیاتی تبدیلیوں پر نظر رکھنے والے ماہرین کا کہنا ہے کہ گزشتہ سال اوسط درجہ حرارت ان کے اندازوں سے کہیں زیادہ رہا، جو کہ کرہ ارض کے درجہ حرارت میں خطرناک اضافے کا واضح اشارہ ہے۔
اخبار دی انڈی پینڈنٹ کے مطابق امریکی خلائی تحقیقاتی ادارے ناسا کے ڈیٹا کے مطابق درجہ حرارت میں ہر سال مسلسل اضافہ ہوتاجارہاہے ماہرین ماحولیات کا کہنا ہے کہ درجہ حرارت میں مسلسل اضافہ عالمی ماحول کے لئے بڑھتے ہوئے خطرے کا اشارہ ہے۔ گلوبل وارمنگ کے نتیجے میں بڑھنے والے درجہ حرارت کی وجہ سے پہلے ہی دنیا کے گلیشیئر پگھل رہے ہیں اور سطح سمندر میں تیزی سے اضافہ ہورہا ہے۔ ماہرین ماحولیات پہلے ہی خبردار کرچکے ہیں کہ آئندہ 50 سال کے دوران دنیا کے متعدد ممالک ،بالخصوص ساحلی علاقے بڑھتے ہوئے درجہ حرارت کی وجہ سے سمندر برد ہوجائیں گے۔جرمنی کے پورٹس ڈیم انسٹیٹیوٹ آف کلائمیٹ امپیکٹ ریسرچ کے ماہر سٹیفن ریم سٹورف نے اس صورتحال پر تبصرہ کرتے ہوئے کہا ”اب ہم ایک ماحولیاتی ایمرجنسی کا سامنا کررہے ہیں۔“ انہوں نے اس بات پر زور دیا کہ دنیا کو گرین ہاو¿س گیسوں کے اخراج پر قابو پانا ہوگا ورنہ ہم اپنے مستقبل کو اپنے ہاتھوں تباہ کرلیں گے۔
