اسلا م آباد (آئی این پی) سپیکر قومی اسمبلی سر دار ایاز صادق نے بدھ کو قونیہ کا دورہ کیاجو کہ ایک پارلیمانی وفد کے ہمراہ تر کی کے دورہ پر ہیں ۔تر کی سے موصول ہونے والی اطلاعات کے مطابق گورنر قونیہ نے سپیکر قومی اسمبلی کا استقبال کیا۔ گورنر ہاؤس میں سپیکر اور گورنر قونیہ کے مابین ہونے والی ملاقات میں پاک تر ک تعلقات کے فروغ خصوصًازرعی پیداوار،زرعی مشینری ،فوڈ پروسیسنگ اور دفاعی
صنعت کے اضافے پر تبادلہ خیال کیا گیا۔ سر دار ایاز صادق نے گورنر ہاؤس میں رکھی مہمانوں کی کتاب میں اپنے تا ثرات قلم بند کیے۔ بعدازاں مقامی میڈیا سے گفتگو کرتے ہوئے انہوں نے کہا کہ پاکستان اور تر کی کے درمیان پائے جانے والے برادرانہ تعلقات خصوصی نوعیت کے حامل ہیں ۔انہوں نے کہا کہ پاکستان کی قومی اسمبلی میں پاک۔تر ک فرینڈزشپ گروپ سب سے بڑا پارلیمانی گروپ ہے اور یہ گروپ دونوں برادر اسلامی ممالک کے مابین پائے جانے والے تعلقات کو مزید مستحکم بنانے کے لیے انتہائی فعال کردار ادا کررہا ہے ۔سپیکر نے کہا کہ مسلمان دنیا کے عظیم صوفی شاعر مولانا جلال الدین رومی کو بڑی عزت کی نگاہ سے دیکھا جاتا ہے جنہیں پاکستان کے قومی شاعر علامہ محمد اقبال کا روحانی استاد بھی تصور کیا جاتا ہے ۔ بعدازاں گورنر قونیہ نے وفد کے اعزاز میں ظہرانہ دیا۔قبل ازیں قونیہ سے اے کے پارٹی کی ممبر پارلیمنٹ اور ڈپٹی گورنر قونیہ نے قونیہ کے ریلوے اسٹیشن پر وفد کا استقبال کیا ۔سر دار ایاز صادق اور وفد کے اراکین نے عجائب گھر اور عظیم صوفی شاعر مولانا جلال الدین رومی کے مزار کا دورہ کیا اور دعاکی ۔ وفد نے قونیہ عجائب گھر میں محفل سماع دیکھی اور مولانا جلال الدین رومی کے مزار کے احاطے میں علامہ اقبال کی علامتی قبر کابھی دورہ کیا ۔یاد رہے کہ قونیہ کو ملتان کا جڑواں شہر ہونے کا درجہ بھی حاصل ہے ۔
