اسلام آباد(مانیـٹرنگ ڈیسک)بلاول کے مقابلے میں مریم نواز کو اتارنے کا فیصلہ، اسلام آباد کے حلقہ این اے 48سے الیکشن لڑیں گی، نجی ٹی وی کا دعوی۔ تفصیلات کے مطابق نجی ٹی وی نے دعویٰ کرتے ہوئے اپنی ایک رپورٹ میں انکشاف کیا ہے کہ مسلم لیگ ن کے

پارلیمانی پارٹی اجلاس کے دوران فیصلہ کیا گیا ہے کہ پیپلزپارٹی کی طرح ن لیگ کی قیادت بھی نوجوان رہنمائوں کے حوالے کی جائے اور اس سلسلے میں بلاول بھٹو کے مقابل مریم نواز کو اتارنے کا فیصلہ کیا گیا ہے جن کوخواتین کی مخصوص نشستوں پر منتخب کروانے کے بجائے براہ راست الیکشن لڑوا کر رکن قومی اسمبلی بنوایا جائے گا اور اس سلسلہ میں انہیں لاہور یا اسلام آباد کےحلقہ این اے 48جو کہ پی ٹی آئی کے رہنما اسد عمر کا حلقہ انتخاب ہے سے آئندہ عام انتخابات میں الیکشن ٹکٹ دیا جائے گا۔ ن لیگ کی پارلیمانی پارٹی اجلاس میں یہ بھی فیصلہ ہوا ہے کہ آئندہ عام انتخابات 2018میں الیکشن مہم کی قیادت مریم نواز کرینگی جو پہلے ہی سے ن لیگ کی وفاقی حکومت کے تعلیم، صحت اور اطلاعات کے سٹریٹجک معاملات کی نگرانی کر رہی ہیں۔واضح رہے کہ ن لیگ کی پارلیمانی پارٹی کا یہ اہم اجلاس پانامہ کیس کے فیصلے سے قبل ایک اہم وقت میں منعقد ہوا ہے جبکہ وزیراعظم نواز شریف کی صاحبزادی مریم نوازکو ذرائع ابلاغ میں حالیہ دنوں میں بھی کافی پذیرائی مل رہی ہے جو کہ ان کے آئندہ آنے والے مستقبل میں اہم ذمہ داریاں سنبھالنے کا عندیہ سمجھا جا رہاہے۔