اسلام آباد(مانیٹرنگ ڈیسک)پاکستان تحریک انصاف کے چیئرمین عمران خان کا پی ایس ایل فائنل کھیلنے پاکستان آنے والے غیر ملکی کھلاڑیوں کو ’’پھٹیچر اور ’’ریلو کٹا‘‘کہنے کی دیر تھی کہ ہر طرف سے توپوں کا رخ کپتان کی طرف موڑ دیا گیا اور سیاسی رہنمائوں سمیت عام عوام بھی پی ٹی آئی چیئرمین سے ان کے اس بیان پر نالاں نظر آئے۔ پاکستانی سیاست ، عوام اور سوشل میڈیا پر

اس وقت سب سے زیادہ گردش کرنےوالا پھٹیچر اور ریلو کٹا کے الفاظ ہیں مگر بہت کم لوگ اس کا مطلب جانتے ہیں جبکہ بہت سوں کو تو یہ بھی نہیں پتا کہ اس کا استعمال پاکستانی کلب کرکٹ میں کیا جاتا ہے۔یہاں ہم آپ کو ان الفاظ کا مطلب اور وجہ استعمال بتانے جا رہے ہیں ۔ پھٹیچر اور ریلو کٹا کلب کرکٹ میں استعمال کی جانے والی ایک اصطلاح ہے جبکہ ’’پھٹیچر‘‘ کے عام لفظی معانی گھٹیا، ردی، پھٹا پرانا، بے ڈھنگا، خراب، خستہ حال، نامکمل اور نقص والا ہیں۔ پھٹیچر کا کرکٹ کی زبان میں مطلب ایسا گمنام کھلاڑی ہے، جسے ٹیم میں نہیں لیا جا سکتا یا جس کی کبھی کوئی خاطر خواہ پرفارمنس نہ رہی ہوجبکہ ’’ریلو کٹا ‘‘کا مطلب وہ ہے کھلاڑی جو آل رائونڈرہو مگر کسی بھی شعبے میں معیاری کارکردگی کا حامل نہ ہو جسے صرف خانہ پری کیلئے رکھا جاتا ہے ۔یعنی تھوڑی باؤلنگ، تھوڑی بیٹنگ اور تھوڑی فیلڈنگ ۔ ریلو کٹا کی مثال مد مقابل دونوں ٹیموں کی جانب سے کھیلنے والے کھلاڑی کیلئے بھی استعمال کی جاتی ہےمثال کے طور پر اگرکسی ٹیم میں کھلاڑیوںکی تعداد 9 ہو تو چار چار کھلاڑیوں کی ٹیم بنا دی جاتی ہے اور نواں کھلاڑی دونوں ٹیموں کی طرف سے کھیلتا ہے۔