بنگلور(آئی این پی) بھارت نے آسٹریلیا کو دوسرے ٹیسٹ میں 75 رنز سے شکست دیتے ہوئے سیریز 1۔1 سے برابر کر دی۔ بھارت نے آسٹریلوی ٹیم کو میچ میں فتح کیلئے 188 رنز کا ہدف دیا جو 112 رنز پر ہی ڈھیر ہو گئی۔ اسٹیو سمتھ 28، پیٹر ہینڈز کومب 24، ڈیوڈ وارنر 17 اور مچل مارش 13 رنز بنا سکے۔ 7 بیٹسمین دوہرا ہندسہ عبور نہ کر سکے۔ بھارت کی جانب سے روی چندرن ایشون نے 41 رنز کے عوض 6 شکار کیے،

امیش یادیو نے 2 جبکہ اشانت شرما اور رویندا جدیجا نے ایک ایک وکٹ حاصل کی۔ تفصیلات کے مطابق منگل کو بھارت نے اپنی دوسری نامکمل اننگز 4 وکٹ پر 213 رنز پر شروع کی تو چتیشور پجارا 79 اور اجنکیا راہنے 40 رنز پر موجود تھے ۔لیکن کوئی بیٹسمین جم کر بیٹنگ نہ کر سکا اور آخری 6 وکٹوں پر صرف 36 رنز ہی بن سکے پوری ٹیم 274 رنز بنا سکی۔  تیسرا ٹیسٹ میچ 16 مارچ سے رانچی میں کھیلا جائے گا۔