اسلام آباد(مانیٹرنگ ڈیسک)پاکستان سپر لیگ کا فائنل کھیلنے کے لئے پشاور زلمی کے غیر ملکی کھلاڑیوں سمیت پورا سکواڈپاکستان پہنچ گیا ہے۔تفصیلات کے مطابق پی ایس ایل کے فائنل میں حصہ لینے کیلئے کوئٹہ گلیڈی ایٹرز کا مقابلہ کرنے کے لئے پشاور زلمی کے کھلاڑی دبئی سے لاہور کے علامہ اقبال انٹرنیشنل ایئرپورٹ پہنچ گئے جہاں سے
کھلاڑیوں کو بلٹ پروف گاڑیوں کے ذریعے سخت سکیورٹی میں ہوٹل منتقل کیا گیا۔ اس موقع پر سیکیورٹی کے انتہائی سخت انتظامات کئے گئے تھے اور سکیورٹی ہائی الرٹ رہی۔پاکستان پہنچنے والے کھلاڑیوں میں پشاور زلمی کے کپتان ڈیرن سیمی، کرس جورڈن، ڈیوڈ ملان، مارلن سیموئلز اور سمت پٹیل میں شامل ہیں، جبکہ زلمی کے سکواڈ کا حصہ پاکستانی کھلاڑی کامران اکمل، محمد حفیظ، وہاب ریاض، حسن علی اور افتخار احمد بھی ہمراہ ہیں، پشاور زلمی کے مالک جاوید آفریدی اور دیگر عملہ بھی لاہور پہنچ گیا ہے۔ پشاور زلمی کی آمد کی خبر نشر ہوتے ہی پاکستانی عوام میں خوشی اور جوش کی لہر دوڑ گئی ہے۔واضح رہے کہ فائنل میچ کیلئے غیر ملکی کمنٹیٹرز کے پاکستان نہ آنے کے باعث پی ایس ایل فائنل میں وسیم اکرم، وقار یونس اور رمیز راجہ کمنٹری کے فرائض انجام دیں گے۔
