لندن(نیوز ڈیسک) برطانیہ کی سپریم کورٹ نے ایک مقدمے میں بیس سال قبل طلاق لینے والی عورت کو اس کے سابقہ شوہر کی دولت میں حصہ دینے کا حق میں فیصلہ کیا ہے۔ 55سالہ کیتھلین وائٹ نے اپنے سابقہ شوہر اور ایک توانائی کمپنی کے بانی 53سالہ ڈیل ونس کے خلاف عدالت میں دعوی کیا تھا ۔ اس سے قبل ڈیل ونس نے اس بنیاد پر کہ ان کی طلاق کو کافی عرصہ ہو چکا ہے ۔ کیتھلین وائٹ کے دعوے کے خلاف اپیل کی تھی جو کامیاب رہی تھی ۔ لیکن اس حالیہ فیصلے میں مقدمہ سننے والے سپریم کورٹ کے پانچوں ججوں نے متفقہ طور پر کیتھلین وائٹ کے حق میں فیصلہ دیا ہے۔ فیصلہ سناتے ہوئے لارڈ ولسن کا کہنا ہے تھا کہ عدالت کو اس بات کا ہر حالات میں خیال رکھنا چاہیے کہ گھر اور خاندان کی دیکھ بھال اور فلاح و بہبود میں شوہر اور بیوی دونوں کا ہم کردار ہوتاہے ۔ مقدمے کے دوران عدالت کو بتایا گیا کہ جوڑے کا ایک بیٹا بھی ہے اور طلاق سے قبل وہ مسافروں جیسی زندگی گزار رہے تھے ۔ لارڈولسن کا مزید کہنا تھا کہ کیتھلین وائٹ نے سولہ سالوں میں بہت مشکل سے اپنے بیٹے کی پرورش کی ہے اور ان کا دعوی قانونی طور پر درست ہے۔ اگرچہ انہوں نے جو 20لاکھ پاؤنڈ کا دعوی کیا تھا اتنا تو ان کو نہیں مل سکتا اور شاید اتنا بڑا دعوی عدالت مسترد بھی کردیتی لیکن ہماری نظر میں ان کو اتنا معاوضہ مل جائے گا جس سے وہ ایک گھر خرید کر آرام سے زندگی گزار سکیں ۔ خیا لرہے کہ کیتھلین وائٹ اور ڈیل کی نوجوانی میں ملاقات ہوئی تھی اور دونوں نے 1981ء میں شادی کی تھی۔ اس وقت دونوں میاں بیوی زیادہ خوشحال نہیں تھے اور ڈیل 1995ء میں اپنا کاروبار شروع کرنے سے پہلے ایک پرانی ایمبولینس میں رہتے تھے ۔ ایک اندازے کے مطابق اس وقت ان کے اثاثوں کی مالیت 10کروڑ پاؤنڈ سے زیادہ ہے۔ کیتھلین وائٹ نے پہلا دعوی 2011ء میں کیاتھا۔