لاہور(آن لائن)وفاقی حکومت نے پنجاب میں رینجرز تعینات کرنے کی سمری منظور کر لی جس کے تحت رینجرز کو پنجاب میں 60روز کیلئے اختیارات دیے جائیں گے۔ میڈیا رپورٹس کے مطابق وفاقی حکومت نے صوبہ پنجاب میں رینجرز تعیناتی کی سمری منظور کر لی ہےجس کے تحت رینجرز کو
پنجاب میں60روز کیلئے مکمل اختیارات ہونگے تاہم رینجرز ہوم ڈیپارٹمنٹ کے تحت کام کریگی اور رینجرز کو پنجاب میں ہوم ڈیپارٹمنٹ کے احکامات پر ہی کارروائی کی اجازت ہو گی جبکہانسداد دہشت گردی ایکٹ کے تحت کارروائی کا اختیار بھی دیا گیا ہے ۔دوسری جانب قانون نافذ کرنیوالے اداروں نے کراچی کو بڑی تباہی سے بچا لیا ، ملیر کے علاقے بکرا پیڑی میں سکیورٹی فورسز کی کارروائی کے دوران کالعدم تنظیم ضلع ٹانک کا امیر گل زمان اور ایک خود کش بمبار سمیت8دہشت گردوں کو ’’پار‘‘ کردیا گیا،ہلاک ملزموں کے قبضے سے اسلحہ ، لیپ ٹاپ بم اور بارودی مواد بھی برآمد کرلیا گیا ۔تفصیلات کے مطابق کراچی میں سیکورٹی فورسز کی جانب سے دہشتگردوں کے ٹھکانوں کی تلاش کا عمل جاری ہے اس دوران ملیر کے علاقے بکرا پیڑی میں حساس اداروں کی اطلاع پر پولیس نے چھاپہ مارا ،دہشتگردوں نے فائرنگ شروع کر دی ، جوابی کارروائی میں پولیس کو ملزموں کی جانب سے مزاحمت کا سامنا کرنا پڑا ۔ صورتحال دیکھتے ہوئے مزید نفری اور رینجرز کو بھی طلب کیا گیا۔اس دوران دہشت گردوں نے سکیورٹی فورسز پر فائرنگ شروع کردی جوابی کارروائی میں کالعدم تنظیم کے ضلع ٹانک کا امیر گل زمان سمیت 8دہشت گردوں کو ہلاک کردیا گیا۔
