نئی دہلی( آن لائن )سچن ٹنڈولکر کو ٹیسٹ اور ایک روزہ کرکٹ میں سب سے زیادہ رنز اور سب سے زیادہ سنچریاں بنانے کا ریکارڈ حاصل ہے اور اس ریکارڈ کو توڑنا آسان ہی نہیں بلکہ ناممکن بھی دکھائی دیتا ہے۔یہ جان کر حیرت ہوگی کہ سچن ٹنڈولکر کو اپنے کیریئر میں بیٹنگ کے دوران ایک ایسے مسئلے کا سامنا تھا جس سے وہ لاعلم تھے لیکن انھیں ایک ہوٹل کے بیرے نے اس کی طرف توجہ دلائی جس کے باعث وہ اس پر قابو پانے میں کامیاب ہوئے۔

ایک انٹرویو میں سچن ٹنڈولکر نے انکشاف کرتے ہوئے کہا کہ ‘اگرآپ کھلے دماغ کے مالک ہیں تو آپ بہت ساری چیزیں بہتر کرسکتے ہیں’۔ٹنڈولکر نے کہا کہ ‘ایک دفعہ چنائی کے ہوٹل میں ایک بیرا میرے پاس آیا اور کہا ‘اگر آپ برانہ منائیں اور ناراض نہ ہوں تو میں آپ سے کچھ کہنا چاہتا ہوں’، میں نے ان سے بات کو جاری رکھنے کو کہا تو وہ گویا ہوئے کہ میری کہنی میں لگا ہوا گارڈ میرے بیٹ کو گھومنے سے روکتا ہے اور وہ سو فی صد درست تھا’۔عظیم بلے باز نے اس کے مشورے پر عمل کرتے ہوئے اپنے کہنی کے گارڈ کو ازسرنو ترتیب دیا۔ان کا کہنا تھا کہ ‘میں جانتا تھا کہ مجھے دشواری پیش آرہی ہے لیکن میں نے کبھی اپنے طورپر ایسا نہیں سوچا تھا اور چند برسوں بعد میری کہنی پر کئی دفعہ چوٹ لگی اور اس سے درد محسوس ہوا تو تب مجھے احساس ہوا کہ میں میری کہنی کا گارڈ ٹھیک نہیں ہے’۔ٹیسٹ کرکٹ میں 51 اور ایک روزہ کرکٹ میں 49 سنچریوں کا ریکارڈ بنانے والے ٹنڈولکر نے ہوٹل کے بیرے کے مشورے پر عمل کرتے ہوئے اس خامی کو دور کردیا۔ایک روزہ کرکٹ میں ریکارڈ 18 ہزار 426 رنز بنانے والے سابق بلیباز نے کہا کہ ‘میں نے فوری طور پر اپنی کہنی کے گارڈ کو دوبارہ ترتیب دیا کیونکہ مجھے اس کو دوبارہ کھولنے اور کام کرنے کی ضرورت پڑتی تھی اور دوسری طرف چوٹ سے بچنے کے لیے فائبر کو ٹھونسنا پڑتا تھا’۔

ٹنڈولکر نے ایک ایسے آدمی کے مشورے پر عمل کرتے ہوئے سنچریاں بنانے کے لیے آسانی پیدا کی جس کو بین الاقوامی کرکٹ کا کوئی تجربہ نہیں تھا۔ٹنڈولکر نے اسی لیے کہا کہ ‘ہمارے ملک میں پان والا سے لے کر ایک بڑی کمپنی کے مالک تک ہرکوئی آپ کو مشورے دے گا لیکن ان مشوروں کے لیے دماغ کو کھولا رکھنا چاہیے’۔