اسلام آباد(آئی این پی) پاکستان میں ٹینس کا عالمی میلہ13برس کے بعد سجنے کا وقت آگیا، ڈیوس کپ ٹائی میں شرکت کیلئے ایران کی ٹیم پیرکوپاکستان پہنچے گی، ایران اور پاکستان کے درمیان ٹائی3 سے 5 فروری تک پاکستان اسپورٹس کمپلیکس اسلام آباد میں کھیلی جائیگی ۔ قومی ٹیم اعصام الحق، عقیل خان، عابد علی اکبر اورعابد مشتاق پر مشتمل ہے جبکہ رشید ملک بطور نان پلیئنگ ٹیم کپتان ہوں گے،

ٹیم مینجمنٹ کے مطابق اعصام الحق کے آنے سے ٹیم بہت مضبوط ہوئی ہے، مہمان ٹیم کواپنے ہوم گرانڈ اورکراڈ میں شکست دینے میں کامیاب رہیں گے۔پاکستان 13برس بعد ٹینس کے انٹرنیشنل مقابلوں کی دوبارہ میزبانی کرے گا۔ یاد رہے کہ پاکستان میں آخری بار2004 میں تھائی لینڈ کی ٹیم نے لاہور کا دورہ کیا تھا اور قومی ٹیم یہ مقابلے اپنے نام کرنے میں کامیاب بھی رہی تھی، بعد ازاں سیکیورٹی خدشات کو جواز بنا کر انٹرنیشنل ٹیموں نے پاکستان میں آنے سے انکارکردیا،رہی سہی کسر مارچ2009 میں لاہور ٹیسٹ کے تیسرے دن بعض شدت پسندوں کی طرف سے سری لنکن کرکٹ ٹیم پر حملے نے پوری کر دی۔اس صورتحال کے بعد پاکستان کو ڈیوس کپ ٹائی سمیت انٹرنیشنل مقابلوں کی ہوم سیریز بھی دیارغیرمیں کھیلنا پڑیں جس کی وجہ سے پاکستانی ٹیم کومتعدد بار ناخوشگوار واقعات کا بھی سامنا کرنا پڑا، پی ٹی ایف حکام کی بھرپور کوشش کے بعد انٹرنیشنل ٹینس فیڈریشن نے 13برس بعد پاکستان کوڈیوس کپ ٹائی کی میزبانی کرنے کی اجازت دی، ابتدا میں ایران نے پاکستان میں ٹائی کھیلنے سے انکار کرتے ہوئے آئی ٹی ایف کو اسے کسی دوسرے متبادل مقام پر کرانے کی درخواست کی تھی تاہم اسے مسترد کردیا گیا تھا، اب ڈیوس کپ ٹائی کا حصہ بننے کے لیے ایران کی ٹیم پیر کو پاکستان

پہنچے گی، ایران اور پاکستان کے درمیان ٹائی 3 سے 5 فروری تک پاکستان اسپورٹس کمپلیکس اسلام آباد میں شیڈول ہے۔