اسلام آباد(آن لائن )عوامی مسلم لیگ کے سربراہ شیخ رشید احمد نے کہا ہے کہ وزیراعظم لال حویلی خالی کرانے کیلئے مجھ سے لڑیں گے تو اقتدار جاتا رہے گا، اگر پانچ مرلے ہی وزیراعظم کا مسئلہ ہے تو مریم بی بی کو گفٹ کردیتا ہوں،نواز شریف نے منی ٹریل نہ بتا ئے توان کیلئے مشکل ہوجائے گی ۔
میڈیا سے گفتگو کرتے ہوئے شیخ رشید احمد نے مزید کہا کہ وزیراعظم چاہیں گے اور ہم لال حویلی خالی کردیں گے یہ اتنا آسان نہیں ہم اپنے حق کے حصول کے لئے آخری حد تک مقابلہ کریں گے۔ شیخ رشید احمد نے کہاکہ پاناما کا ہاتھی عدالت میں زیر بحث ہے اور یہ لوگ عدالت میں جتنی دیر کریں گے عوام میں حکومت کا کیس کمزور ہوگا اور ابھی تک ایک دستاویز جمع نہیں کروائی گئی۔ سیاسی قبر کی دیواروں تک پیچھا کریںگے۔پوری دنیا کے اخبار اور ایجنسیاں کہہ رہی ہیں کہ فلیٹس نواز شریف کے ہیں۔انہوں نے کہا کہ نواز شریف اگر نااہل ہوجاتے ہیں تووہ چودھری نثار، احسن اقبال اور حمزہ شہباز کو کبھی وزیراعظم نہیں بنائیں گے کیونکہ وہ سب کچھ مریم نواز کو وزیراعظم کی کرسی پر بٹھانے کے لئے کر رہے ہیں۔
