کراچی(این این آئی) چینی وفد نے جمعرات کوپاکستان اسٹاک ایکسچینج پی ایس ای میں ایکسچینج کا چارج سنبھالنے اور معاملات کو بہتر بنانے کے حوالے سے پی ایس ای کا دورہ کیا۔اس ضمن میں پی ایس ای کے ترجمان نے بتایا کہ چائنیز کنسورشیم نے گذشتہ ماہ پی ایس ای کے 40 فیصد شیئرز کی خریداری کے بعد چائنیز دنیا میں تیزی سے دوبارہ ابھرتی ہوئی پاکستان کی پہلی کیپٹل مارکیٹ میں مثبت دلچسپی لے رہے ہیں۔
جمعرات کو ہونے والے اجلاس کے ایجنڈے کے حوالے سے پوچھے گئے سوال پر انہوں نے کہا کہ اب وہ پی ایس ایس کے مالک ہیں، جب وہ چاہیں یہاں آسکتے ہیں اور بیٹھ سکتے ہیں۔ انہوں نے بتایا کہ دنیا کی 10 بہترین اسٹاک ایکسچینجز میں پی ایس ای بھی شامل ہے اور دنیا کے لئے بہت پرکشش ہے، مزید عالمی معیار کے سرمایہ کار اس مارکیٹ میں شراکت دار بننا چاہتے ہیں۔ انہوں نے مزید کہا کہ ان تمام پیش رفت کی وجہ سے بالخصوص غیر ملکی سرمایہ کاری کے لئے بہت اچھا پلیٹ فارم حاصل ہوا ہے۔
