کابل/لندن(آئی این پی) اپنی شربتی آنکھوں سے شہرت پانیوالی افغان مونالیزا ڈی پورٹ ہونے کے بعدپہلی مرتبہ میڈیا کے سامنے آگئی جس نے انکشاف کیا ہے کہ پاکستان میں گرفتاری کے خدشے کے پیش نظرپہلے ہی اپنا گھر بیچ دیاتھا۔برطانوی نشریاتی ادارے ’’بی بی سی‘‘ کو دیئے گئے انٹرویو میں شربت گلہ نے بتایاکہ وہ کئی دیگر مہاجرین کی طرح پاکستان میں 35سال مقیم رہیں لیکن گزشتہ سال غیرقانونی طورپر پاکستانی شناختی کارڈ بنوانے پر سزا بھگتنے کے بعد ڈی پورٹ کردی گئی۔
شربت گلہ نے بتایاکہ پاکستان میں اچھا وقت گزرا، پڑوسی اچھے تھے لیکن مجھے یہ توقع نہیں تھی کہ بالآخر حکومت پاکستان ایساسلو ک کرے گی ۔انہوں نے بتایاکہ رہائشی دستاویزات نہ ہونے کی وجہ سے گرفتاری کے خدشے کے پیش نظر پہلے ہی اپنا گھر بیچ دیا تھا،منصوبے کے مطابق افغانستان روانگی سے دوروز قبل شام کو سیکیورٹی فورسز نے چھاپہ مارا اور گرفتار کرلیاتھا۔شربت گلہ نے بتایاکہ انہوں نے پولیس اہلکاروں کو آگاہ کردیاتھا کہ شناختی کارڈ بنانے کے صرف دومقاصد تھے ، پہلا اپنے بچوں کو تعلیم دلانا اور دوسرا گھربیچنا، کیونکہ شناختی کارڈ کے بغیر یہ کام نہیں ہوسکتے ۔واضح رہے کہ پاکستان نے اپنی شربتی آنکھوں سے شہرت پانیوالی افغان مونالیزا کو ڈی پورٹ کردیا تھا ۔ شربت گلہ اب کابل میں اپنے پانچ سالہ بیٹے اور تین بیٹیوں کیساتھ مقیم ہے جہاں کئی سالوں کی مشکلات کے بعد اب وہ پرسکون رہناچاہتی ہے ۔
