کراچی(آئی این پی)کراچی کے مختلف علاقوں میں زلزلے کے جھٹکے محسوس کیے گئے جس کے باعث لوگوں میں شدید خوف و ہراس پھیل گیا۔ کراچی کے مختلف علاقوں میں زلزلے کے جھٹکے محسوس کیے گئے جس کے باعث لوگوں میں شدید خوف و ہراس پھیل گیا اور لوگ کلمہ طیبہ کا ورد کرتے ہوئے گھروں سے باہر نکل آئے، تاہم ابھی تک کسی جانی و مالی نقصان کی کوئی اطلاع نہیں ملی، زلزلے کے جھٹکے گلستان جوہر، گلشن اقبال ، گلزارہجری، نارتھ کراچی، نارتھ ناظم آباد اور سہراب گوٹھ سمیت دیگر علاقوں میں محسوس کیے گئے۔
زلزلہ پیما مرکز کے مطابق صرف کراچی میں ہی زلزلے کی شدت زیادہ اس لئے محسوس کی گئی کہ زلزلے کا مرکز کراچی ہی میں تھا اور اس کی شدت 3.6 ریکارڈ کی گئی،زلزلے کی گہرائی 12 کلو میٹر تھی جب کہ اس کا دورانیہ 10 سیکنڈ تھا۔ماہرین نے کراچی میں بارہ کلو میٹر کی گہرائی میں آنے والے زلزلے پر گہری تشویش کا اظہا ر کیا ہے اور خبردار کیا ہے کہ مستقبل قریب میں اس سے اگر زیادہ شدت کا زلزلہ آیا اور اس کا مرکز بھی کراچی ہی ہوا تو اس سے بڑے پیمانے پر نقصان کا اندیشہ ہے،زلزلے کے جھٹکے جھٹکوں کے باعث این ای ڈی یونی ورسٹی اور جامعہ کراچی میں طالب علم کلاسوں سے باہر نکل آئے،جبکہ کئی گھروں میں زلزلے کے دیواروں میں دراڑیں بھی پڑ گئیں۔
