لاہور( نیوز ڈیسک) پاکستان تحریک انصاف کے چیئرمین عمران خان نے کہا ہے حکومت جوڈیشل کمیشن کے حوالے سے سنجیدگی کا مظاہرہ نہیں کر رہی۔ عوام تیار رہیں این اے ایک سو بائیس کے فیصلے کے بعد سڑکوں پر آنے کا فیصلہ کریں گے۔ چیئرمین پی ٹی آئی عمران خان کا میڈیا سے گفتگو میں کہنا تھا کہ این اے ایک سو بائیس کے فیصلے کے بعد سڑکوں پرآنے کا فیصلہ کریں گے۔ جوڈیشل کمیشن کے حوالے سے حکومت سنجیدگی کا مظاہرہ نہیں کر رہی اگر یہی رویہ رہا تو ہم احتجاجی تحریک دوبارہ سے شروع کر دیں گے۔ عمران خان نے کہا پہلے بھی احتجاج میں اہل لاہور نے بھرپور ساتھ دیا اب بھی یقین ہے لاہورکے لوگ ہمارے ساتھ ہوں گے۔ چیئرمین تحریک انصاف خواتین کے عالمی دن کے حوالے سے تقریب میں شرکت کے لیے لاہور آئے تھے۔عمران خان نے کہا خیبرپختونخوا میں بلدیاتی انتخابات بائیو میٹرک سسٹم کے ذریعے کرائیں گے۔ چیئرمین سینیٹ کے الیکشن میں حصہ لینے کا فیصلہ پارٹی اجلاس میں ہو گا اور پنجاب اور سندھ میں بلدیاتی انتخابات کا اعلان ہو گا تو حصہ لینے کا سوچیں گے ۔ ایوان اقبال میں یوم نسواں کی تقریب سے عمران خان کا خطاب کرتے ہوئے کہنا تھا کہ خواتین کے حقوق کےلئے کھڑی نہ ہونے والی جماعت ختم ہو جائے گی‘ ان کا مزید کہنا تھا کہ اپنے حقوق کےلئے کھڑے ہوں وعدہ کرتا ہوں ساتھ دوں گا۔نیا پاکستان بننے سے کوئی نہیں روک سکتا‘ میری والدہ نے ہمیشہ مجھے ظلم و ستم کےخلاف لڑنے کی تعلیم دی ۔