اسلام آباد (آئی این پی) اسسٹنٹ کمشنرانڈسٹریل ایریا اسلام آباد کیپٹن(ر)شعیب علی نے تشدد کا شکار کمسن طیبہ سے سویٹ ہوم میں بغیر اجازت ملاقات پر پابندی عائد کردی جبکہ میڈیا کو بھی طیبہ کی سرگرمیوں کی فوٹیج اور تصاویر بنانے سے روکتے ہوئے طیبہ کے قیام کے دوران سویٹ ہوم آنی والے تمام افرادکی فہرست تیار کرنے کا حکم دے دیا۔ تفصیلات کے مطابق ہفتہ کو اسسٹنٹ کمشنر انڈسٹریل ایریا کیپٹن ریٹائرڈ شعیب علی کی جانب سے کمسن گھریلو ملازمہ طیبہ سے سویٹ ہوم
میں بغیر اجازت ملاقات پر پابندی کے احکامات جاری کر دیئے گئے اس کے ساتھ ساتھ میڈیا کو بھی سویٹ ہوم میں طیبہ کی سرگرمیوں کی فوٹیج اور تصاویر بنانے سے روک دیا گیا ہے۔ اسسٹنٹ کمشنر کی جانب سے جاری حکم نامے میں کہا گیا کہ طیبہ سے غیر مجاز افراد کی ملاقاتیں سپریم کورٹ کے احکامات کی خلاف ورزی ہے ڈسٹرکٹ مجسٹریٹ کی اجازت کے بغیر میڈیا کو بھی طیبہ سے نہ ملنے دیا جائے، طیبہ کے قیام کے دوران سویٹ ہوم آنے والے تمام افراد کی فہرست تیار کی جائے۔
