لاہور(آئی این پی) ترجمان وزیراعظم نے کہاہے کہ ہمارے ملک میں استغاثہ کمزور ہے جبکہ پلی بارگین کو جلد پارلیمنٹ میں سب کے سامنے لارہے ہیں ۔سوموار کے روز اپنے ایک انٹر ویو میں وزیر اعظم تر جمان مصدق ملک نے کہا کہ ہمارے کے کمزور استغاثے کی وجہ سے ملزم جرم کرتا ہے اور مقدمہ کی پیروی کمزورہونے کے باعث رہا ہونے کے بعد باہر آکر دوبارہ سے وہی کام شروع کر دیتا ہے۔اسی چیز کو مد نظر رکھتے ہوئے حکومت پلی بارگین کا نظام قائم کررہی ہے تا کہ خوردبرد کرنے والوں کو سزا دی جاسکے اور ساتھ ہی ساتھ حکومتی خزانے کو بھی فائدہ پہنچے۔
انہوں نے کہاکہ کسی بھی ملزم سے پلی بارگین کرنے سے پہلے اسے عدالت میں پیش کیا جائے گا اور جج صاحبان دیکھیں گے کہ پلی بارگین کی جائے یا نہیں۔ترجمان وزیراعظم نے کہا ہے کہ حکومت نے اس بات کی بھی ہدایت کی ہے کہ جہاں تک ممکن ہو پلی بارگین کرنے سے گریز کیا جائے اور کرپشن میں کوئی شخص ملوث ہو اسے منظر عام لاکر دوسروں کیلئے نشان عبرت بنایا جائے۔ جبکہ پلی بارگین سے حتمی فیصلہ حکومت ہی کرے گی۔
