لاہور ( این این آئی) سول ڈیفنس کے 400 رضا کاروں کو بغیر نوٹس نوکری سے فارغ کر دیا گیا ، رضا کاروں نے احتجاجی مظاہرہ کرتے ہوئے اپنے مطالبات کے حق میں شدید نعرے بازی کی۔ بتایا گیا ہے کہ اورنج لائن ٹرین روٹ کے لیے سول ڈیفنس کے بھرتی کیے گئے چار سو رضا کاروں کی نوکری سے چھٹی کروا دی گئی۔
رضا کاروں نے اپنے مطالبات کے حق میں بھر پور احتجاج کرتے ہوئے نعرے بازی کی۔ان کا کہنا تھا کہ انتظامیہ کی جانب سے زبانی کلامی 27ماہ کا کنٹریکٹ کیا گیا لیکن ایک سال بعد ہی بجٹ نہ ہونے کے باعث نوٹس دیئے بغیر نوکری سے فارغ کر دیا گیا ہے۔
احتجاج کرنے والے رضا کاروں نے کہا کہ ہماری پرفارمنس کا عوام سے پوچھا جا سکتا ہے۔ ہمارا کوئی اور ذریعہ معاش نہیں، انتظامیہ ہمیں نوکری پر بحال کرے۔رضا کاروں نے وزیر اعلیٰ پنجاب سے انصاف کی اپیل کی ہے۔واضح رہے کہ میٹرو ٹرین منصوبے سے وابستہ ان 400 سے زائد ملازمین کا روزگار ان کے اہلخانہ کے ہزاروں افراد کیلئے گزر اوقات کا سبب تھا۔

موضوعات:پنجاب حکومت میٹرو ٹرین