بیجنگ ( این این آئی)نئے سال سے چینی کمپنی کراچی سے کوڑا کرکٹ اکٹھا کرے گی ،سندھ حکومت کو کچرے سے بجلی بنانے کی پیشکش بھی کر دی گئی۔وزیراعلی سندھ سید مراد علی شاہ سے چائنیز کمپنی کے وفد نے ملاقات کی جس میں انہیں سوئپنگ مشینری سے متعلق بریفنگ دی گئی۔ترجمان وزیراعلی سندھ کے مطابق چینی کمپنی کراچی کے دواضلاع ساؤتھ اورایسٹ میں صفائی کا کام کرے گی کمپنی کی سوئپنگ مشینری جنوری کے پہلے ہفتے میں کراچی پہنچ جائے گی۔چینی کمپنی نے وزیر اعلی سندھ کو بریفنگ دیتے ہوئے کہا کہ ہم گھروں سے کچرا اٹھانے سڑکوں کی میکینیکل سوئپنگ اور کچرے کی منتقلی کا کام جنوری کے آخر یا فروری کے پہلے ہفتے میں شروع کردیں گے جبکہ لینڈ فل سائٹ پر کچرے کو کمپریس بھی کیا جائے گا چینی کمپنی نے کچرے سے بجلی بنانے کی بھی پیشکش کی ہے۔واضح رہے کہ وزیراعلی سندھ ان دنوں چین کے سرکاری دورے پر موجو د ہیں جہاں انہوں نے کراچی سرکلر ریلوے کو سی پیک منصوبے میں شامل کرالیا ہے۔

موضوعات:چینی کمپنی سندھ حکومت