راولپنڈی/ کراچی(این این آئی )چیف آرمی سٹاف جنرل راحیل شریف نے کہا ہے کہ پاکستان کے دشمنوں کی طرف سے کراچی میں امن و امان کی صورتحال خراب رکھنے کے تمام عزائم ناکام بنا دیئے گئے ہیں،کر اچی میں معمولات زندگی بحال ہو چکے ہیں اور کاروباری سرگرمیاں زور پکڑ رہی ہیں،حاصل شدہ کامیابیوں کو ضائع نہیں ہونے دینگے ،افسراور جوان پیشہ ورانہ سرگرمیوں پر توجہ مرکوز رکھیں ،
سپاہ گری کی بہترین روایت قائم رکھی جائے ۔ آئی ایس پی آر کے مطابق چیف آف آرمی سٹاف جنرل راحیل شریف نے اپنے الوداعی دوروں کے سلسلہ میں بدھ کو کراچی کا دورہ کیا جہاں انہوں نے کراچی کوراور سندھ رینجرز کے افسروں اور جوانوں سے خطاب کیا ۔ آرمی چیف نے کراچی اور اندرونی سندھ میں سیکیورٹی صورتحال بہتر بنانے کے سلسلہ میں انکی غیر معمولی کامیابیوں پر خراج تحسین پیش کیا۔
انہوں نے کہا کہ کراچی میں معمولات زندگی بحال ہو چکے ہیں اور کاروباری سرگرمیاں زور پکڑ رہی ہیں اورقومی معیشت کی بحالی میں کراچی اپنا اہم کردار ادا کر رہا ہے ۔ جنرل راحیل شریف نے کہا کہ کراچی میں امن و امان کی صورتحال خراب رکھنے کے دشمن کے تمام عزائم ناکام بنا دیئے گئے ہیں ۔ اس سلسلہ میں حاصل ہونیوالی کامیابیوں کو ضائع نہیں ہونے دینگے ۔ آرمی چیف نے کہا کہ پائیدار امن کیلئے سو ل قانون نافذ کرنیوالے اداروں کی استعداد کار کے فروغ کیلئے صوبائی حکومت کے ساتھ ہماری مربوط کوششیں ہر حال میں جاری رہنی چاہئیں ۔
جنرل راحیل شریف نے بین الاقوامی سرحد کی نگرانی پر سیکیورٹی فورسز کو سراہا ۔ انہوں نے آرمی اور رینجرز کی جانب سے خاص طور پر دور دراز علاقوں اور سندھ کے صحرائی علاقوں میں آفات اور بحرانی صورتحال میں سماجی خدمات کو خاص طور پر سراہا۔ جنرل راحیل شریف نے افسروں اور جوانوں کو تلقین کی کہ وہ اپنی پیشہ ورانہ سرگرمیوں پر توجہ مرکوز رکھیں اور سپاہ گری کی بہترین روایت قائم رکھی جائے ۔ قبل ازیں آرمی چیف کی آمد پر کور کمانڈر لیفٹیننٹ جنرل نوید مختار نے انکا استقبال کیا۔
