لاہور(آئی این پی) پنجاب حکومت نے اورنج لائن میٹرو ٹرین منصوبے کے چینی کنٹریکٹر کو کسٹم ڈیوٹی میں بڑی چھوٹ دینے کا فیصلہ ، سی آر نورینکو کو 50 کروڑ کی ادا شدہ کسٹم ڈیوٹی واپس اداکرنے کی منظوری دے دی گئی، وفاق کو خط لکھا جائے گا ۔ تفصیلات کے مطابق اورنج لائن میٹرو ٹرین منصوبے کے چینی کنٹریکٹر سی آر نورینکو نے منصوبے کے ہیلتھ اینڈ سیفٹی، پلمبنگ، بنیادی انفراسٹرکچر اور الیکٹریکل مکنینکل ورکس کے شروع کرنے سے قبل ابتدائی سامان چائینہ سے منگوایا تھا۔ سی آر نورینکو نے چین سے منگوائے گئے سامان پر 50 کروڑ روپے کی کسٹم ڈیوٹی دی تھی۔

وزیر اعلیٰ پنجاب کوسی آر نورینکو کو کسٹم ڈیوٹی واپس کرنے کی سمری پنجاب ماس ٹرانزٹ اتھارٹی نے بھجوائی تھی۔ ذرائع کا کہنا ہے کہ 50 کروڑ روپے پنجاب حکومت اپنے خزانے سے ادا کرے گی۔ ذرائع کا کہنا ہے کہ پنجاب حکومت چینی کنٹریکٹرز کو کسٹم ڈیوٹی کی واپسی یقینی بنانے کے لئے پالیسی بنانے پر غور کررہی ہے جس پر پنجاب حکومت چینی کنٹریکٹرز کو کسٹم ڈیوٹی سے استثنیٰ کے لئے وفاق کو خط لکھے گی۔ چیئرمین سٹیئرنگ کمیٹی اورنج لائن میٹرو ٹرین ومشیر وزیراعلی پنجاب خواجہ احمد حسان کاکہنا ہے کہ چینی کنٹریکٹرز کو کسٹم ڈیوٹی بنیادی معاہدے کے مطابق واپس کی جارہی ہے۔انہوں نے کہاکہ حکومت پنجاب ہر بار کسٹم ڈیوٹی واپسی کو یقینی بنانے کے لئے جامع حکمت عملی بنارہی ہے اور وفاقی حکومت سے چینی کنٹریکٹرز کو کسٹم ڈیوٹی میں استثنیٰ دینے کے لئے درخواست کرے گی۔

موضوعات:اورنج ٹرین وزیراعلیٰ پنجاب