اسلام آباد(آئی این پی )صدر مملکت ممنون حسین نے پارلیمنٹ کا مشترکہ اجلاس کل 17نومبر کو طلب کرلیا،ترک صدر طیب رجب اردگان مشترکہ اجلاس سے خطاب کریں گے۔منگل کو اجلاس بلانے کا باضابطہ سمن جاری کردیا گیا۔ترک صدر کے پارلیمنٹ ہاؤس سے خطاب کے موقع پر سیکیورٹی کے خصوصی انتظامات ہونگے،میڈیا اور مہمانوں کیلئے خصوصی دعوت نامے جاری کیے جائیں گے۔ترجمان قومی اسمبلی کے مطابق سیکیورٹی وجوہات کی بناء پر پارلیمانی گیٹ پر میڈیا کیمرے نصب نہیں کیے جائیں گے۔چیف آف آرمی سٹاف جنرل راحیل شریف سمیت دیگر عسکری قیادت،چاروں گورنرز،وزراء اعلیٰ اور آزادکشمیر کے صدر وزیراعظم اور گلگت بلتستان کے گورنر وزیراعلیٰ کو بھی اجلا س میں شرکت کی خصوصی دعوت دی گئی ہے۔
واضح رہے کہ ترک صدر سے ملاقا ت کیلئے وقت لینے کیلئے تحریک انصاف کے ترک سفارتخانے سے رابطے،پی ٹی آئی ترک صدر کو پارلیمنٹ کے مشترکہ اجلاس میں شرکت نہ کرنے کی وجوہات سے آگاہ کریگی،پاکستان تحریک انصاف کے وائس چیئر مین شاہ محمود قریشی نے تصدیق کی ہے کہ پی ٹی آئی پارلیمنٹ کے مشترکہ اجلاس میں ترک صدر کے خطاب کا بائیکاٹ کریگی ۔شاہ محمود قریشی نے کہا کہ پارٹی نے فیصلہ کیا ہے کہ وہ ایک ایسے متنازع وزیر اعظم کی سربراہی میں ہونے والے مشترکہ اجلاس میں شرکت نہیں کریں گے جس پر کرپشن کے الزامات ہیں۔شاہ محمود قریشی نے کہا کہ پی ٹی آئی ترکی کو ایک مخلص دوست اور برادر اسلامی ملک سمجھتی ہے اور پارٹی ترک صدر کیلئے احترام کا جذبہ رکھتی ہے۔انہوں نے کہاکہ پاناما گیٹ کیس میں ان کی جماعت کا موقف واضح ہے جو کہ فی الحال سپریم کورٹ میں ہے۔شاہ محمود قریشی نے بتایا کہ وہ اسلام آباد میں ترک سفارتخانے سے رابطے کررہے تھے تاکہ ترک صدر سے ملاقات کیلئے وقت مل سکے۔شاہ محمود قریشی نے کہا کہ وہ پاکستان آنے والے ترک صدر سے عمران خان کی قیادت میں ملاقات کے خواہاں ہیں۔انہوں نے بتایا کہ پی ٹی آئی ترک صدر کو پارلیمنٹ کے مشترکہ اجلاس میں شرکت نہ کرنے کی وجوہات سے آگاہ کریگی