اسلام آباد(این این آئی)وفاقی وزیر داخلہ نے کہاہے کہ سعودی سفارتکار کے قتل میں ملوث عناصر کو ہر صورت انصاف کے کٹہرے میں لایا جائے گا،وفاقی وزیرداخلہ چودھری نثارعلی خان سے سعودی سفیر مرزوق الزہرای اوربرطانوی ہائی کمشنر تھامس ڈریو نے الگ الگ ملاقات کی، ملاقات میں دونوں ممالک کے تعلقات، سیکیورٹی سمیت مختلف امور میں جاری تعاون اور خطے اور عالمی سطح پر رونما ہونے والی تبدیلیوں پر بات چیت کی گئی۔وزارت داخلہ کی جانب سے جاری بیان کے مطابق
جمعرات کووزیرِداخلہ چوہدری نثار علی خان سے سعودی سفیر عبداللہ مرزوق الزھرانی نے ملاقات کی ۔ ملاقات میں پاک سعودی تعلقات، سیکیورٹی سمیت مختلف امور میں جاری تعاون اور خطے اور عالمی سطح پر رونما ہونے والی تبدیلیوں اور 2011میں کراچی میں سعودی سفارت کار کے قتل کیس کی تفتیش پر بھی بات چیت کی گئی۔اس موقع پر وفاقی وزیر داخلہ نے کہاکہ سعودی سفارتکار کے قتل میں ملوث عناصر کو ہر صورت انصاف کے کٹہرے میں لایا جائے گا۔انہوں نے کہاکہ حکومت پاکستان اور عوام سعودی عرب سے اپنے تعلقات کو بہت اہمیت دیتے ہیں اور ان دیرینہ تعلقات میں مزید وسعت کے خواہاں ہیں۔قبل ازیں برطانوی ہائی کمشنر تھامس ڈریونے بھی وزیرداخلہ چودھری نثارعلی خان سے ملاقات کی ملاقات میں پاک برطانیہ تعلقات اورمختلف امورمیں جاری دوطرفہ تعاون پر بات چیت کی گئی۔
