اسلام آباد (مانیٹرنگ ڈیسک ) وفاقی وزیر سیفران اور سابق جنرل غلام قادر بلوچ نے کہا ہے کہ جنرل راحیل شریف اپنی مدت ملازمت میں توسیع نہیں لیں گے۔ انہوں نے دعویٰ کیا ہے آرمی چیف اپنی مدت ملازمت میں توسیع نہیں لیں گے ریٹائر منٹ کے بعد گھر چلے جائیں گے۔ سابق جنرل نے اپنے ایک انٹریو میں بتایا کہ میں انہیں بخوبی جانتا ہوں اس لئے وثوق سے یہ بات کہہ رہا ہوں۔ انہوں نے کہا کہ دوران ملازمت جنرل پرویز مشرف اور جنرل راحیل شریف کراچی اور کوئٹہ میں میرے ساتھ رہے ہیں میں ان دونوں کو بخوبی جانتا ہوں اور اسی بنیاد پر کہتا ہوں کہ جنرل راحیل شریف مدت ملازمت میں توسیع نہیں لیں گے۔ انہوں نے کہا کہ جنرل راحیل شریف ایک بہت پروفیشنل آدمی ہیں اور اچھے فوجی ہیں۔ وہ نہ تو توسیع کے حق میں ہیں اور نہ ہی توسیع لیں گے۔ غلام قادر بلوچ نے کہا کہ میں نے حکومت کو مشورہ دیا ہے کہ سنیارٹی کی بنیاد پر اگلے آرمی چیف کا انتخاب کیا جائے اور حکومت اور فوج کے مابین کسی بھی قسم کا تناؤ پیدا نہ ہونے دیا جائے۔

موضوعات:راحیل شریف