اسلام آباد (این این آئی) محکمہ موسمیات نے کہاہے کہ نومبر اور دسمبر میں معمول سے کم بارش کی توقع ہے اس لیے گرد آلود دھند کا سلسلہ جاری رہے گا ٗشہری علاقوں میں گرد آلود دھند کثیر مقدار میں فضا میں موجود رہنے کا امکان ہے۔فورکاسٹنگ آفیسر محمد ایاز کے مطابق آئندہ 24گھنٹوں کے دوران ملک کے بیشتر علاقوں میں موسم خشک رہیگاتاہم کشمیر اور گلگت بلتستان میں بعض مقامات پر گرج چمک کیساتھ بارش اور بلند و بالا پہاڑوں پر برفباری کا امکان ہے۔اس کے علاوہ فیصل آباد، ساہیوال، گوجرانوالہ، سرگودھا، لاہور، ملتان، بہاولپور اور سکھر ڈویژن میں گرد آلود دھند پڑنے کا امکان ہے۔آئندہ 48گھنٹوں کے دوران ملک کے بیشتر علاقوں میں موسم خشک رہیگا ٗ پنجاب کے میدانی علاقوں میں گرد آلود دھندکا سلسلہ جاری رہنے کا امکان ہے۔انہوںنے بتایا کہ گزشتہ 24 گھنٹوں کے دوران ملک کے بیشتر علاقوں میں موسم خشک رہا تاہم مالاکنڈ ڈویژن میں بارش ہوئی۔ سب سے زیادہ بارش مالم جبہ05، لوہردیر، سیدو شریف04، کالام میں 03ملی میٹر ریکارڈ کی گئی ٗ فیصل آباد، سرگودھا اور لاہور ڈویڑن کے علاقوں میں دھند پڑی۔

موضوعات:بارش