تہران(این این آئی)ایرانی ذمے داران نے انکشاف کیا ہے کہ 90% ایرانی عوام ورزش نہیں کرتے اور ان کا ملک عراق کے بعد دنیا کا غمگین ترین ملک شمار کیا جاتا ہے۔میڈیارپورٹس کے مطابق ایرانی وزارت صحت کے ذمے دار رضا ملک زادہ نے یزد شہر میں صحت سے متعلق ایک کانفرنس میں بتایا کہ ایران میں 50% اموات ناقص غذا کی وجہ سے ہوتی ہیں۔ ایران دنیا بھر کے ممالک میں عراق کے بعد دوسرا غمگین ترین ملک ہے۔انہوں نے مزید بتایا کہ سماجی زندگی سے متعلق عالمی اعداد و شمار کے مطابق ان کا ملک خوش ممالک میں شمار نہیں ہوتا اور عالمی سروے میں شامل 185 ممالک میں اس کا 105 واں نمبر ہے۔ موسوی کے مطابق ایران میں نفسیاتی مسائل کی شرح میں اضافہ ہو رہا ہے۔ انہوں نے کہا کہ دارالحکومت تہران کے بعض علاقوں میں تو یہ تناسب 80% ہے جو کہ بحرانی صورت حال کی جانب واضح اشارہ ہے۔انہوں نے ان اعداد و شمار کے ذرائع کا حوالہ نہیں دیا تاہم اس سے قبل امریکی ادارے گیلپ کی جانب سے جاری سروے رپورٹ میں دنیا کے غمگین ترین ممالک کی فہرست جاری کی تھی جس میں عراق پہلے اور ایران دوسرے نمبر پر تھا۔