اسلام آباد (مانیٹرنگ ڈیسک) کراچی میں پیش آنے والے خوفناک حادثے کے بعد ایک اور حادثہ پیش آ گیا ہے ۔ لاہور اسلام آباد موٹروے پر پیش آنے والے خوفناک حادثے میں 5 گاڑیاں آپس میں ٹکرا گئیں جس کے نتیجے میں موقع پر ہی 4افراد جاں بحق ہو گئے جبکہ شدید زخمیوں میں سے بھی مزید 7 افراد دم توڑ گئے ۔ تفصیلات کے مطابق لاہور اسلام آباد موٹروے پر حافظ آباد سیکشن سکھیکھی کے قریب حادثہ پیش آیا جس کے نتیجے میں ابتدائی طور پر 4 افراد کے جاں بحق ہونے کی اطلاعات تھیں۔مگر تازہ ترین اطلاعات کے مطابق پولیس ذرائع نے بتایا ہے کہ مزید 7 افراد جاں بحق ہو گئے ہیں جس کے نتیجے میں اس وقت تک جاں بحق ہونے والوں کی تعداد 11 ہو گئی ہے ۔ حکام کے مطابق ہلاکتوں میں اضافے کا خدشہ بھی ہے ۔
واضح رہے کہ اس سے قبل آج صبح کراچی میں بھی ٹرینوں کا خوفناک حادثہ پیش آیا تھا ۔ تفصیلات کے مطابق کراچی کے علاقے لانڈھی کے قڈافی ٹاؤن میں فرید ایکسپریس ریلوے لائن پر کھڑی تھی جس سے زکریا آ کر ٹکرا گئی ۔حادثے میں زکریا ایکسپریس کی تین بوگیاں مکمل طور پر تباہ ہو گئیں۔ جس کے نتیجے میں 17 سے زائد مسافر جاں بحق ہو گئے جبکہ 40 سے زیادہ زخمی ہیں جن میں خواتین اور بچے بھی شامل ہیں ۔ حادثے کی اطلاع ملتے ہی آرمی کی ریسکیو ٹیمیں موقع پر پہنچ گئیں اور امدادی کارروائیوں کا آغاز کر دیا ۔ ملیر روڈ خراب ہونے کے باعث زخمیوں کی ترسیل کے کام میں مشکلات کا سامنا کرنا پڑ رہا ہے ۔ جبکہ جاں بحق افراد کی میتیں جناح ہسپتال منتقل کی جا رہی ہیں۔ مزید اطلاعات کے مطابق ٹرینوں میں ابھی تک زخمی پھنسے ہوئے ہیں جن کو نکالنے کے لئے امدادی سرگرمیاں تیزی سے جاری ہیں۔ حکام کی جانب سے ہلاکتوں میں اضافے کا امکان بھی ظاہر کیا جا رہا ہے۔

موضوعات:حادثہ