لاہور( این این آئی)پاکستان پیپلز پارٹی کے مرکزی رہنما سینیٹر اعتزاز احسن نے کہا ہے کہ (ن) لیگ کی قیادت ہمیشہ کندھے پر کلہاڑی رکھ کر اقتدار میں آتی ہے اوراپنے پاؤں پر خود کلہاڑی مارنے میں اس کا کوئی ثانی نہیں،قومی سلامتی کے اجلاس کی خبر لیک ہونے کا معاملہ وزیر اطلاعات کو عہدے سے ہٹانے سے ختم نہیں ہوگا بلکہ یہ بہت آگے جاتاہوا دکھائی دے رہا ہے ،
حکومت نے پی ٹی آئی کے احتجاج کے معاملے پرپہلے روز سے مسل دکھانے کی پالیسی اپنا رکھی ہے جسکے منفی نتائج نکلیں گے۔ ایک انٹر ویو میں اعتزاز احسن نے کہا کہ مسلم لیگ (ن) کے لوگ وژن سے عاری ہیں اور اس لئے ’’ ڈیلی ویجز ‘‘ کی بنیاد پر سیاست کرتے ہیں ۔ حکومت میں شامل بعض لوگوں کا کردار خود اس کے لئے مسائل کا باعث بنتا رہا ہے۔
انہوں نے کہا کہ (ن) لیگ کی قیادت تجربہ کار ہونے کا دعویٰ تو کرتی ہے لیکن ان کا یہ تجربہ سیاست نہیں بلکہ کرپشن کرنے میں ہے ۔موجودہ حکومت کے دور میں کرپشن کے اپنے ہی ریکارڈ توڑ ے گئے ہیں۔ انہوں نے کہا کہ پی ٹی آئی کے احتجاج کے معاملے میں حکومت نے جان بوجھ کر حالات خراب کئے ۔شروع دن سے کہہ رہے ہیں کہ پانامہ لیکس کا معاملہ اب ایسے ختم نہیں ہوگا بلکہ اس کے لئے حکمرانوں کو احتساب کے کٹہرے میں آنا ہوگا۔
